مسافر زاده الخيال

انت ممكن تتخيل نفسك ريشه في هوا تفضل تطلع لفوف لفوق حتى تعدى السحاب وترقص التانجو مع النجوم مع انك تخين وما بتقدرش حتى تمشى خطوتين وعلى أول طوبة تجعلها مقعدا للراحة.
وممكن تتخيل أنك أغنى رجل بالعالم وثروتك تفوق بل جيتس رغم انك لاتملك إلا قوت يومك بالكاد.
وهناك من يتخيل نفسه الواد الجن اللى بغمزه واحده من عينيه تترامى ضحاياه من النساء تحت قدميه يطلبن الرضا والهوى الفتاك.

الخيال واسع وكل يتخيل وفقا لما يأمل ويمليه عليه عقله الباطن .
ولكن هناك خيال أوسع من اللازم يعنى 10 أكس لارج بفتحتين وسوستة من الجنب يجعلك تسافر بعيد لتتخيل أنك مثلا مثلا سبارتكوس محرر العبيد أو جيفارا محرر أمريكا اللاتينيه أو هيرقل عظيم الروم أو مارتن لوثر كنج الناشط السياسى أو عزوز أبو قورة ! أو سوسكا بلابل !.

من حقك تتخيل ولكن على قدك وما تركبش خيالك وتقول له سوق بينا يا اسطي على الكورنيش ناكل دره ونشرب شيح وتلاقى نفسك خابط في شجره أو واقع في بلاعة مفتوحة في الشارع.

لو عشطان و ناسى

فى ناس تحب تشرب الشاى فى فنجان وفى ناس بتشربه فى كوبايه والجديد المج.
وفى ناس مزاجها تشرب القهوة التركى فى فنجان وناس مزاجها تشربه فى كوباية.
إنما شوفتوا حد بيشرب الحب ؟.
وليه لأ؟.
ما اروع الحب عندما يغلى على نار هادئة حتى يصل لدرجة العشق المحموم .
ولو أنت عطشان حب وحبك شلال جارف بلاش تشربه لا بفنجان ولا بكوباية ولا بالمج يا سيدي أشربه فى حلة تيفال ولو مش مقضية صب فى سطل وقربع وأروى ظمأك .
حب على نار هادئة وعيش وقتك وتذوق طعم الحياة .

وميل واسقيني يا واد عمي ميل و اسقيني انا مش عشطانه يا واد عمي حبك يرويني.

فى ناس بتصحى الصبح كده وفى ناس بتصحى كده

فى ناس تصحي الصبح مبتسمة وكأن ابتسامتها زخات مطر تنثر على البشر فتنعش القلوب وتعطرها فتعلو السعادة على الوجوه فهؤلاء هم أصحاب الوجه البشوش.
وفى ناس تصحي الصبح بوزها شبرين وكأنها كانت نائمة تحلم بالجديد في عالم الأذى والحقد والكراهية فتربك القلوب وهؤلاء هم أصحاب الوجه العبوس.
أجعل صباحك يبدأ بابتسامة رائقة تسعد الآخرين.
ولو كنت من أصحاب الوجه العبوس يعنى خلقتك كده ومش قادر تغير من نفسك يا سيدى خد لك جنب وحط مراية قدامك وعكنن على نفسك وسيب الغير فى حالة.

رجل بلا قلب

الشارع مزدحم بالمارة كعادته كل مساء.
أحدهم كان يمر أمامى متثاقل الأرجل يترنح كالسكارى.
فجأة وقع منه شىء على الأرض.
ناديت عليه بصوت عال لاكثر من مرة :
- أنت يا أخ ... أنت يا أستاذ ... أنت يا كابتن حوش اللى وقع منك.
التفت الي أخيرا وقال لى دون مبالاه :
- لا مش عايزه انا اللى رميته.

سبحان الله الراجل رمى قلبه ومش عايزه.

لو ... جوانا شيء

حاول تطلع اللى جواك ...
ما هو لو ما طلعتش اللي جواك ها يفضل جواك يأن ويزن ليل نهار .
قول اللي في نفسك ؛ لا تكبت زفراتك وتجعلها حبيسة أدراج قلبك.
لو فضلت مكبوت لأنك مش عارف تكنس اللي جواك ها تلاقيك انتفخت وبقيت زى الكورة وتتلاعب بك مشاعرك.
حاول تطلع بره نفسك وشم نَفسك وشوف الدنيا بعينيك أنت ولا تستلف عيون الآخرين فالبعض منهم عيونه "مدعمسة " يعنى " معمصة " لا ترى إلا القبح ما هي مش متعودة ترى الجمال.
لو جواك شيء ومش عارف تطلعه ولازق لزقه مغرية ولا نافع معاه خبط ولا رزع ولا حتى زفة بالطبل البلدي ؛ لا تستكين ولا تُحبط حاول مرة تلو الأخرى ولو فشلت يبقى عليك وعلى الشيخة ( مراهم ) تعملك زار.

عاد مع الريح

عاد بعد أن جفت منابعه .
الخجل يطوح رأسه يمينا ويسارا ... قال لها متلعثما:
سسسماح .. يا أهل السسسماح .. يا بخت من سسسسامح.
تطلعت إليه من أسفل لأعلى مستدعية ذاكرتها و بكبرياء امرأة قالت له:
لسه فاكر قلبى يديلك أمان ولا فاكر كلمة ها تعيد اللي كان؟
أدارت ظهرها له ... خرج يجر أذيال خيبته ... صوت باب الشقة " ديييب ... طاااخ "
أنقطع الاتصال ...
هذا الرجل خارج نطاق الخدمة.

ذهب مع الريح

يا من صورت ليا الدنيا كقصيدة شعر
روح منك لله ........ هكذا قالت له.

فقط نظر إليها ... خر ساكنا ... ترك المكان ... أطفأت الأنوار
وأسدل الستار.