إعلان

الآن بجميع مكتبات مصر والوطن العربي --------->>>>> (( أحدث إصدارات الكاتب عادل إدريس المسلمي..... " الزناتي حنيفة -العجب ألوان - مقرمشات ساخرة " عن دار الراية للنشر والتوزيع ))<<<<<------


الثلاثاء، 18 يوليو، 2017

حد بسمعنا زغرودة

والحكاية 
قضية مثارة حاليا في ولاية (يوتا) الأمريكية ملخصها أن أحد الأشخاص ويبلغ من العمر أربعين عاما طلب إشهار عقد زواجه من اللاب توب الخاص به وسبب إثارة الموضوع أن مكتب النائب العام بالولاية قد رفض إشهار الزواج قائلا "أن الحالة ليست محمية دستوريا ولا يمكن الموافقة علي ذلك حتى لا يتم التوسع في زواج أشخاص من آلات ومعدات ولا يعتبر ذلك الرفض انتهاكا لحقوق الإنسان".
وقد أستأنف هذا الشخص دعواه مستندا علي أن المحاكم اعترفت بحق الأفراد من نفس الجنس بالزواج ويجب علي هذه المحكمة أن تزيد من توسيع الحق فى الزواج لتشمل إمكانية الزواج بين شخص وجهاز لاب توب مرتبط به عاطفيا وقد أثار هذا الرفض بعض من جمعيات حقوق الإنسان باعتبار أن الرفض يعد انتهاكا لحق إنساني أصيل,
انا بصراحة مش مهم عندي اللي يحصل في بلاد الفرنجة فقد سبق وأن تزوجت امرأة من حمار وأخري من كلب وأيضا أخري من الهامستر وآخر تزوج من سلحفاة.. يعنى شيء عادي فما يحدث في الغرب ناتج عن حريات للأفراد.
ولكن أنا اللى مخوفني أننا كعرب ننقل ونقلد كل ما يحدث في الغرب وأمريكا وحتى بلاد الماوماو والباوباو والدلائل كثيرة ومنها الشرلستون والهيبز زمان وقصة عرف الديك و قصة الماعز والكابوريا والحلق في الأذن مرورا بالبنطال الساقط لاظهار البوكسر المشجرثم البنطال الفيزون الخانق للأفخاذ والبنطال الممزق من الخلفية للإبهار وغيره من التقليد الأعمى ليصبح من يفعل ذلك أمام الغير متأمرك أو متفرنج .
ولكن الخوف كل الخوف وخاصة أننا نعيش الآن الحرية بلا حدود وأن يخرج علينا أحد الأشخاص العرب ليعلن دون تحرج بأنه سيتزوج من التلفاز أو من الموبايل أو من النظارة أو من البسكلته أو السيارة الهامر وممكن بردو تطق في دماغ واحد عاوز يتزوج من فرخة بلدي أو من وزة وإن رفض طلبة سيتجه إلي سفارة أمريكا لحق اللجوء حيث أتهم بالجنون لأنه عاوز يتزوج من وزة و كما يفعلها البعض زاعما بأنه شاذ جنسيا أو لا ديني أو من الجنس الثالث أو ماشى بيحدف شمال.
عجبت لك يا زمن ومش بعيد نسمع عن أحد الأشخاص طالب الزواج من "المرحاض" .
يا حلاوة الدنيا يا حلاوة يا حلولو يا حلاوة.

سؤال يحيرني

ما يحيرني فعلا ما تذيعه وكالات الأنباء العالمية يوميا عن عدد قتلي تنظيم داعش وأن التنظيم علي وشك الفناء وأري العكس تماما وهذا يجعلني أتساءل ...
هل تستخدم أمريكا وحلفاءها قنابل ( البوب كورن) وصواريخ ( الهوت دوج ) ؟ .
أم أنهم يعلمون جيدا أننا نائمون في سبات عميق فقط نصحو لنتجرع جعة (منقوع البراطيش ) ثم نعاود الشخير فينشرون أعداد قتلي علي المزاج لتفرح قلوبنا ونعلي الزغرودة ونهتف فيفا أمريكا ..الله يعطيها ألف عافية .. ألف عافيه إيه .. نخليها مليون عافيه.

الخميس، 25 مايو، 2017

الجمعة، 5 مايو، 2017

أين نحن ؟

سألني صديق لي وهو متألم بشدة...
العالم حولنا يتباري بأسلحته الفتاكة فهذه الدولة لديها صواريخ عابرة القارات بالرؤوس النووية وتلك لديها منظومة الردع الحازم وأخري لديها القنبلة العنقودية .. فأين نحن من كل ذلك؟
فقلت له ...
- يا صديقي العزيز نحن لدينا سلاح الغاز القاسي الآسي.
- معقولة .. والله أسعدتني جدا ولكن ما هو هذا السلاح القاسي الآسي ؟.
- أننا نمتلك بطون بكروش هائلة حينما تأكل الفت باللحم الضأن ومن صنوف المحاشي سواء باذنجان أو الكرنب وكذا القرنبيط وهذا القلقاس العجيب ناهيك عن الفول مع البصل والمشهيات من أصناف المخللات فيتفاعل ما بهذه البطون تفاعلا كيمائيا غريب التكوين علي شكل " ذرات "فتكون ما يسمي بالغاز القاسي الآسي الفتاك الذي لا يرحم مخلوق علي اليابسة فلو تم تعبئته في قاذفات وتطلق من فوق الجبال فلسوف تخدر الأعصاب وتعمي الأبصار ويروح من تصيبه بحالة تسمي "السكسة العقلية" فتراه يصرخ كالمجنون ضاربا بيده رأسه ويظل يجري ويجري إلي منتهاه فهناك من يموت في الحال وهناك من يقتل نفسه برصاصة الرحمة .. فلا تقل لي أين نحن؟.

السبت، 25 مارس، 2017

البودي لانجوج Body Languag


سألني صديق ...
قل لنا .. ماهي لغة البودي لانجوج 
شوف يا صاح بالمفهوم الفلسفي العلمي لعشائر المختصين بالتنمية البشرية هي تلك الحركات التي يقوم بها بعض الأفراد مستخدمين أدوات الجسد لتوصيل المعلومة بشكل أفضل. 
فقال لي ...
- ما تفهمنا أكتر ينوبك ثواب؟
يعنى لما مراتك ترفع لك حاجبها الشمال لفوق.. تعرف أنك تحت الملاحظة علي إثر هاجس راودها ومنتظرة التأكد فخذ حذرك.. أما لو رفعت الحاجب اليمين فقد تأكدت وجاري تجهيزك لضربة قاضية فابحث لك عن مخرج آمن.
وأما لو هرشت في أنفها وأنت داخل عليها .. فهي في وضع سيء للغاية فابتعد عنها ولا تحادثها وأذهب مسرعا ع السرير وأعمل نفسك مريض ومسكتك الرعشة.
ولو وجدت أن زوجتك جالسة أمامك وتهز أرجلها تارة وتضع واحدة علي الأخرى تارة أخري فأعرف أنك علي مشارف موقعة حربية عاتية فقد تكون نسيت عيد ميلادها أو عيد الزواج أو الفلانتين فحاول مسرعا استرجاع ذاكرتك قبل أن ترفع الراية السوداء وتستمع إلي نشيد صليل الصوارم. 
سكت صديقي ثم سألني ..
وماذا عن لغة الشفايف؟
والله دي بقي حسب المود بتاع مراتك.
فسر لي ينوبك ثواب؟.
شوف يا أبني...
لو مصمصت شفايفها وأنت داخل عليها البيت وتاعب نفسك وشايل مثلا كيس شيبسي بطعم الكباب فهي تريد أن تقول لك" ياما جاب الغراب لأمه".
ولو عضت بأسنانها الشفاة العليا أجري بسرعة خارج المنزل ولا تلتفت وراءك ولا تعود إلا بعد دفع الفدية فقد تكون اكتشفت كلمة سر حسابك بالفيس بوك أو راجعت موبايلك أو أيقنت أنك تلعب خارج ملعبها.
أما بقي يا حبيب قلبي لو هي راضية عنك فتجد شفتاها ترتعش وتتراقص لتقول لك...
" عشطان تعاشب "
بادرني قائلا...
طيب لو مش عشطان مثلا يعني ؟.
يبقي ها تعيش طول عمرك عشطان و قابلني في حانة الأقدار. 
تحياتي

السبت، 18 مارس، 2017

ابتسم وأنت ساكت


أحيانا تشعر بأنك جوعان نوم لدرجة أنك علي وشك السقوط علي أقرب فراش بجانبك وتنتهز فرصة عدم وجود أحد بالمنزل وترمي بنفسك فوق السرير وما هي إلا دقائق وقبل أن تنعم بحلم النوم العميق تجد من يقتحم عليك الحجرة ليقول لك...
" الله أنت جيت .. أتعشيت".
ويروح منك النوم وتظل تحايل فيه ودون جدوى.
وأحيانا ومع وجود أحد بالمنزل وتخبره بعزمك علي القيام بغطسة نوم عميقة تحتاج إليها وتقوم بكل طقوس التماسي علي الجميع وتدخل مستقلا سريرك وتغط في النوم وإذا من يأتي إليك ليسألك...
" ها تنام للصبح .. ولا تحب نصحيك أمتي؟ ".
وطبعا راح النوم .
ويا سلام بقي لما تكون صارم في أنك داخل تنام ومش عاوز حد بقرب ناحيتك وتسمع الرد بحاضر مع ابتسامة توديع وأجمل تحية لليلة سعيدة وما أن تبدأ في الدخول في مرحلة ما بعد التقلب شمال ويمين وتبدأ عينك تغفل تجد أصوات عالية خارج الحجرة محذرة المقتحم ...
" رايح فييييييييين .. ما تخشش .. هو قال محدش يزعجني"
مع انك خلاص انزعجت وراح النوم.
وشر البلية ما يضحكك ..
وحدث بالفعل...
أنك تكون تعبان وتتألم من وجع عاتي والطبيب كتب لك أقراص مهدئة ومدرجة بجداول الممنوع تداولها إلا بواسطة روشتة طبيب ومعروف ومختومة وتدوخ بحثا عنها بالصيدليات وكل صيدلي يمطرك بالأسئلة المختلفة وكأنه بيعمل لك بحث حالة وفي الآخر يقول لك آسف مش موجودة وبعد بحث مضني تحصل بالكاد علي شريط وما أن تصل لمنزلك فرحا بأنك ستنام وتتناول القرص وتروح في النوم فتجد يد تخترق أضلاعك بهزات متتالية وكأنه زلزال بقوة 10 ريختر وتستمع لمن يقول ...
" مالك في إيه .. شخيرك عالي أوى .. خضتنا عليك"
ويروح مفعول القرص وطبعا صعب تاخد قرص تاني حسب إرشادات الطبيب.
وفي كل مرة تمسك نفسك ولا تتنرفز .. ها تتنرفز ليه .. الناس اللي حواليك بيطمنوا عليك وببخافوا عليك .. يبقي تبتسم وتسكت .
تحياتي

علي كل لون يا جروبات


جاءتني دعوة جميلة كريمة في رسالة من صديق قلما بل نادرا أن أراه علي متصفحي يطلب مني بشياكة الانضمام لجروب هو مؤسسة ورغم أنني هجرت معظم الجروبات التي كنت أسعد جدا بالانضمام إليها نظرا لعدم فاعليتها .
توكلت علي الله واتجهت لهذا الجروب وفقا للعنوان حاملا باقة ورد ...
رنيت الحرس .. واضح انه لا يعمل .. دببت علي الباب نقرات خفيفة حتى لا أزعج أحد .. ولكن دون جدوى وأخيرا قررت أن أستخدم كف يدي خبطا علي الباب ومناديا ....
- يا جماعة يا اللي هنا .. يا أخوانا يا اللي هنا .. يا أصحاب الجروب.
وأخيرا .. خرج أحد الأشخاص ممسكا بشمعة ومن الواضح أنه كان يغط في نوم عميق .. تثاءب وكأن فمه نفق شبرا فتراجعت للخلف تخوفا أن تنحشر رأسى فيه...
- أيوه .. نعم .. مين حضرتك؟
- مش هو ده جروب سلمولي علي الحبايب؟.
- أيوه هو بعينه .
- أنا جاي بناء علي دعوة الأستاذ الكاتب والشاعر والفيلسوف عطوة شرارة حب.
- أهلا أهلا وسهلا وميت مرحبا نورت الجروب والله .. أتفضل
- حضرتك مين؟.
- سماعين عبتواب الديروطى
ظلام دامس وجو رطب ورائحة غريبة عطنة .. ووصلنا إلي أريكة أظن أنها ترجع لعصر ما قبل التاريخ ...
- هو ما فيش حد هنا غيرك؟.
- زى ما أنت شايف حضرتك .. مافيش إلا أنا هنا.
- ومن زمان وأنت هنا؟.
- ها اخش علي يجى سنة.
- وجيت هنا أزاي؟.
- والله كان في إعلان علي الفيس مطلوب أدمن يجيد من خمس لست لغات وكوني خريج كلية الألسن فتقدمت للامتحان ونجحت وعينوني أدمن بدرجة ممتاز وقالولي أتفضل أحضر لاستلام العمل .. وكم كانت فرحتي.. أى والله زمبؤلك كده وأمي زغردت وكل ما تشوف واحدة من قرايبي تقولها سماعين أستوظف أدمن بالمحروسة وطبعا الست تزغرد وأمي تزغرد لغاية لما كل أهل النجع عرفوا أنى ها اتوظف أدمن مع أني ما اعرفش أيه وظيفة الأدمن دى ولما سألت الأستاذ عطوة شرارة حب قالي بعدين ها اشرح لك.. ودعت العيلة بالصعيد وخدت قطر اتناشر ووصلت وقعدت مع كام نفر منهم الأستاذ عطوة شرارة حب وقالولى أنت بقي هنا الكل في الكل و مهمتك أى حد يجيلك بطلب تقبله وتروح رازعه الكام كلمة دول مع شوية الورد دول وبس وجابلولي الكام كرسى دول علي الكنبة ديه وبطانية وعدة شاى.
- الله الله بس ايه الحكاية .. ما فيش أى تفاعل ولا حاجة.
- والله علمى علمك زى ما أنت شايف كده .
- طيب ما تروح وتسيب أم الجروب ده.
- وأقول إيه لأمي وقرايبى .. فشلت ولا فشلت ولا يعنى فشلت.
- لا خليك منور الجروب .. واستأذن أنا بقي.
- لا ها تروح فين لازم تستنى الأستاذ عطوة شراة حب لما يجي.
- وهو ها يجى أمتي؟.
- علمى علمك ممكن يجي بعد يوم بعد شهر بعد سنة .
- معلش ها ابقي أمر عليه وقت تاني يكون وصل.
- طيب نقوله مين حضرتك؟.
- قول له الأخ عادل حبك نار.

القوة الناعمة


جلسا يتناوبا شد الأنفاس من الجوزة المعمرة بصنف من الواضح أنه هاي فاي فضرب في النخاشيش فطوح الدماغ فقال أحدهم ...
- اللي قولي يا سديكي العزيز سحس أنا بأسمع كلام مش فاهمه من الناس اللي بترغي كل يوم في التلفسيون وبصفتك يعني مسكف ومعاك شهادة عليا بس الزمن رقصك وشحططك ورماك عندي.. هي إيه الكوة الناعمة دي؟
عدل سحس من جلسته وشد نفس وأخرجه يتراقص علي واحده وربع...
- سؤال جامد أوي يا عيسوي يخرب عقلك .. ده واحد يا سيدي خواجه أسمه جوزيف ناي مدرس كبير في جامعة أمريكية طلع علينا وقال أن في حاجة أسمها القوة الناعمة وبالافرنجي تنطق Soft power وهي القدرة علي الجذب والضم من غير إكراه أو استخدام القوة يعنى مش بالعافية وبكده تقدر تأثر علي الشعوب وتلمهم حواليك وتبقي زى الفل ودماغك تبقي آخر راحة وميه ميه.
- يا راااااااااااجل وده بقي اللي عمل النزريه اللي اسمها زوفت برر دي طبعا قبض منها دوررات تعبي شوالين.. صح؟.
- أكيد ماهو تعب بردو وهرش دماغه كام سنة وسهر وقرايه وتجارب.
- تصدق بالله يا سديقي .. ده إحنا ناس في الاستكانيس خالص ولا لينا لزمة ونستاهل الضرب بالجزمة.
- ليه بس؟.
- يابا كوة ناعمة إيه وزوفت برر إيه اللي الحاج باى ده تعب وسهر وهرش دماغه علشان يطلع لينا بالنزريه دي .. ده إحنا أصل الكوة الناعمة.
- إزاي .. فهمنى؟.
- شد لك نفس وأكتم وطلع علي مهلك أوي وأنا ها أفهمك يا متعلم .
- مساء الفل عليك .. قول يا هندسة ...
- بص علي المزة اللى ماشية هناك دى .. دي كوة ناعمة ولا مش كوة ناعمة يا عم الحاج؟.
- يا رااااااااااااجل معقول .. ده غير اللي في دماغ الراجل خالص؟.
- ومش معقول ليه.. ودماغ إيه .. طيب ها أسألك سؤال ؟
- أسأل .
- الراجل اللي أسمه زوزيف باي ده وصف الكوة الناعمة وقال إيه؟
- قال هي القدرة علي الجذب والضم.
- الله عليك يا حبيب والديك .. ها اثبت لك كلامي من غير ما نتعب نفسينا.
- قول وأنا سامعك .
- طب شد نفس تاني عميييق خليه يشعشع في نافوخك وناولني عقلك.
- مسااااء الجمال .. معاك عقلي وعلي الهوا مباشرة.
- و أنت مروح خذ معاك هدية حلوة للمودام بتاعتك وتبع هواها .. يعنى لو بتحب تتريح هات لها إزازة ريحة ويا ريت تكون ماركة بتشعشع في الجو زى مثلا الهوا هوايا أو بحبك أنت وبس ولو بتحب الحلويات هات تشكيلة مع حتة قشطة ولو بتحب الكباب خش عليها بكيلو مشكل بالسلطات وما تنساش البابا غنوج ولو بتحب الكوارع عدي علي مسمط الحبايب وزود ممبار ولو أنت بقي واد ميه ميه وأستاذ في فن الدلع الأصلي خش عليها بشبشب أحمر بفيونكة ع الجنب كعب عالي .. و أووووبا بقي هاتشوف ألوان السما السبعة من اللي ها يحصلك يا برنس البرنسات .. ها تلاقي أحلي حضن أتحضن في تاريخ الحنان كله من أيام جدك مينا لغاية دلوقت.. بجذب وضم وكل علامات التشكيل في اللغتو العربيتو الفوسحي.. وأبقي قابلنى لو عرفت تفلفص منها .. صح الكلام ولا مش صح؟.
- آه صح .. أهو ده الكلام .. الله ينور عليك.
- يا با ده إحنا اللي عندنا أصل الكوة الناعمة مش الخواجات وإحنا أصل النزريات بس ماعندناش دماغ نفكر بيها من ساعة لما خدوها منا علي سبيل الأمانة وأدونا بدلها فردة جزمة قديمة .. يعنى لو كل واحد متجوز ظبط مراته بكلمة حلوة تضرب في نافوخها ولا بهدية علي قده تلهلب مشاعرها ها تلاقي الأحضان عامله فيضان ومش ها تلاقي ست بتشتكي وبتدعي علي جوزها في ساعة عصرية أن عزرائيل يحضنه ولا ها تلاقي راجل قاعد علي قهوة زهقان وبيلعن سلسفيل اليوم اللي أتجوز فيه ولا حد من النوشتاء يطلعلك ويقولك عاوزين نعمل ثورة تالتة تاني علمي علوم تطلع من مدرسة الربيع العربي الثانوية المشتركة .. ماهو كله ها يكون هايص ولايص.. ماهو يا سديقي المثل بيقول إيه.. .
" أحضن مراتك ها تعرف تعيش حياتك .. ما تحضنهاش .. ما ها تتنهاش ".
- شد يا برنس البرنسات .. آل نزريات آل .. أنت قولتلي الراجل الخواجة ده أسمه إيه؟
- جوزبف ناي.
- طب أبعت له مسشز علي المشانزر وقول له حبيبك عيسوي بيقولك باي.
تحياتي