إعلان

أحدث إصدارات الكاتب عادل إدريس المسلمي لعام 2021 .. الفانتازيا الساخرة (سعيكم مشكور) إصدار دار الراية للنشر والتوزيع .. متواجدة بمعرض القاهرة الدولي للكتاب 2021 وقريبا بمكتبات مصر والدول العربية

الثلاثاء، 18 يونيو 2013

الأستحمار والأستبقار وما يثلثهما


        عندما خرج علينا منذ ما يقرب من عقدين من الزمان شحتور الدغف بفلسفته الجديدة وشرحها فى كتابه " الاستبقار واحة الاحرار" وتقوم فلسفته الجديدة أن الانسان الذى يستبقر يشعر براحة نفسية تجعله يعيش فاقد للوعى بما يدور حوله وهذا يجعله لا يصاب بأمراض ضغط الدم وتراه يتفحل يوما تلو الآخر وقد أتخذ من البقرة فلسفته على أساس انها هادئة ورزينة بطبعها  تمشى برقة ودلال ولا تلتفت لما يحدث من حولها حتى ولو كانت قنبلة مدوية.
      إلا أنه لم ينل التكريم المناسب فقد تصادمت معه القوى المضادة وهى الاستحمارية و مؤسسها طحيمر الترللى وهى أقدم المدارس على الأطلاق والتى تعتبر نفسها صاحبة فلسفة خاصة تقوم على مفهوم " أستحمر وبلاش تعبر " وهى المدرسة التى نشارك فيها جميعا من قديم الأزل وأتهمت شحتور الدغف بأنه لص سارق للأفكار وليس هناك جديد عنده ولا هناك فرق بين الاستحمار والاستبقار وأنما هو يريد أن يثبت وجودة كونة جاء بعلمه من بلاد الفرنجة ولا زال الجدل قائما بينهما وكل يتهم الآخر بأنه الفكر الرائد.
     وما زاد الطين بلة هو تسلل جماعة جديدة كانت قد أنسلخت من المدرسة الأستحمارية وقد أستغلت الخلاف القائم بين المدرستين وأسست مدرسة فلسفية حديثة تحت مسمى الأستكلاب وبشعار لفت الأنظار وهو " هوهو وخليك بعيد ها تعيش سعيد " وقد أستحوزت هذه الموجة الفلسفية الجديدة على عقول الكثيرين الذين ملوا من الاستحمار الذى بلد عقولهم والأستبقار الذى زاد تفحلهم وتمشيا مع الموضة  وأنضموا إليها على أساس أن الهوهوه تخيف عن بعد .
     وأصبح الشارع المصرى يعج الآن بثلاثة مدارس ما أروعها " الاستحمارية – الأستبقارية وثالثتهم الأستكلابية " ولك أن تتخيل ماذا سيحدث عندما يتجمع مريدى ومحبى كل مدرسة فى ساحة الكلام ؟.

أكيد سنرى العجب ... وستصدح أحلى سيموفينية نتراقص معها رقصة التانجو على أنفاس البانجو.

الجمعة، 14 يونيو 2013

حصريا مع كسعمة

بعد محاولات مضنية والبحث عنه فى كل مكان وجدته قابع فى خلوته بإحدى خوانق المحروسة ودار هذا الحديث:
-       مساء الفل يا أستاذ كسعمة.
-       مساء الجمال يا حضرة.
-       انا عادل إدريس ودوخت عليك السبع دوخات لاتشرف بالجلوس معاك.
-       شغل ولا دردشة صحفية ولا محبة.
-       بصراحة محبة لانى سمعت عنك وحبيت أتشرف بمعرفتك.
-       يا هلا .. ها مشروبك ساخن ولا بارد ؟.
-       اشرب شاى فتله.
-       انا كلى طواعية وأأمرنى يا أستاذ إدريس.
-       الامر لله وحده ... انا عرفت أنك أشهر زمبجى حاليا فى مصر بعد شحته بازوكا.
-       الف رحمة ونور عليه شحته بازوكا كان أستاذنا وعلى إيده اتلمذنا ... الفاتحه على روحه.
-       ولا الضالين آمين ... أنما انت اسمك كسعمة اصلا ولا شهرة؟.
-   شوف يا حضرة أنا أسمى الحقيقى بدران علوله وشهرتى كسعمة لانى وبعون الله لما أفرقع زمبة تكسعم اللى قدامى وتهيج ملايين .
-       يعنى مثلك الاعلى على كده المرحوم شحتة بازوكا؟
-   بازوكا كان له طريقة غير طريقتى انا طورت نفسى وقريت كتير وما تنساش أنى خريج ألسن يعنى اعرف لغات وده ساعدنى انفتح على الغرب وبلاد العم سام واعرف الزمبه هناك إزاى وطبعا كل ده خلانى اتفوق على بازوكا لانه يا دوب كان واصل للاعدادية إنما الحقيقة كانت زمته تريح الجثة.
-       لكن إزاى بتخترع الزمبة؟
-   دى بقى حاجة ربانى وإلهام وسر المهنة وحسب طلب الزبون يعنى لو عايز زمبة الهوا هوايا يعنى فركشة على خفيف دى ليها سكة زى الطلاق أو تبويظ فرح أو افساد تجارة أو تقليب شريك على شريكه وغيره من الصنف الخفيف إنما لو زمبة تقيله ماركة نار يا حبيبى نار يبقى دى عايزة شغل كتير وتكتيك عالى وترتيبات ومساعدين وكله بتمنه.
-       يعنى بتاخد كام يعنى فى الخفيف وكام فى التقيل؟.
-   أوعى تكون بتاع ضرايب متخفى هههههههههههه الخفيف ممكن من 5 بواكى وطالع وحسب قيمة الزبون إنما التقيل ده بقى عايز قاعده وخد وهات وممكن نوصل لنص أرنب ماهو برضه فى ناس بتسترزق معايا.
-       ومين زباينك فى صنف نار يا حبيبى نار؟.
-   دى أسرار والمهنة بتاعتى دى عايزة اللى يحفظ السر وإلا كنت مرحوم من زمان زى شحتة بازوكا ماهو مات لانه قال عن موضوع أحداث الامن المركزى ماهو اللى رتب أحلى زمبه فى تاريخه بس للاسف اتكلم ويادوب ساعة زمن و شمموه الهوا من فوق جبل المقطم وقالوا فى الجرايد واحد انتحر لان مراته خانته يعنى موتوه بجرسه .... معلهش أستأذنك الموبايل بيرن.
-       ألو أيوه أنا كسعمه.
-       .....
-       تؤمرنى يا باشا.
-       ....
-       يا سلام ما انت عارف سيادتك انا خدامك من زمان.
-       ....
-       ياااااااااااااااااه بس كده مش ها الحق دى حدوته كبيره وعايزة شغل من نار.
-       ...............
-   هههههههههههه آه طبعا .. بس كده ... انا عندى صنف جديد لسه والله مبرشم وبالسلوفان ومظبطه آخر تظبيط لانى حاسس ها تجيلى مكالمه من الباشا فى أى وقت وقلت أطلع بصنف جديد لانج  يلعلع وآخد دعوة منك يا باشا.
-       ........
-       اسمه بأودعك آخر وداع.
-       .........
-       لا على ضمانتى وبعون الله ها تشوف أحلى شغل يخلى الحب الكبير يبعتلك جواب شكر.
-       ......
-       أرنب أخضر مع دكر بط.
-       ......
-   ما انت عارف يا باشا دى بقى الزمبة الكبرى لا تقولى بقى مسيلمه ولا حتى أبن سبأ ده شغل كسعمة علوله ومعاه شهادة ضمان خمس سنين
-       ......
-   لا دكر البط قبل الأرنب  الأخضر انت عارف الشباب ما بيبطلوش طلبات وعلى الاقل فيها يجى خمسين واحد ها يشتغل الليله ديه.
-       ......
-       يوصلنى اليوم نص الأرنب مع دكر البط.
-       .....
-       تحياتى يا باشا ومنتظر الزيارة.
-       لامؤاخذه يا أستاذ إدريس أعمل إيه ؟ سبوبه جايه وسخنة ومتألجة.
-       ربنا يبارك لك واضح انها زمبة مدوية.
-       دى ماركة بأودعك آخر وداع ... صنف جديد لسه بشوكة .
-       اللى قولى يا كسعمه وسرك فى بير  هى الزمبه دى ها تفرقع فى مصر؟.
-       لا لا لا لا طبعا أعوذ بالله ده كلام يا أستاذنا؟.
-       أمال فين يا كسعمة ؟
-        كلام فى سرك بس أوعى تقول لحد أرجوك  ... عارف فين؟.
-       فين وما تخافش ؟.

-       فى كولالمبور.

الأربعاء، 5 يونيو 2013

مسا التماسى


-       مسا التماسى يا هندزة.
-       أحلى مسا عليك يا حلمبوحه  من يد من نعدمها.
-       تعميرة استفكس بريفكس تستاهل نافوخك.
-       براوه عليك باين من الدخان اللى طاير بيرقص عشرة بلدى وخمسه بسرة.
-       إلا قولى يا هندزة إيه اللى بيحصل معانا؟.
-       تقصد إيه يا حلمبوحه؟.
-       أحنا بقينا مهزأة  واتمرمطنا من للى يسوى واللى ما يسواش.
-       إزاى يعنى؟.
-   يعنى ازيوبيه ديه تعمل فينا كده وعايزة تنشف ريقنا وتجففنا ونغنى عشطان تعالى أشرب البق بخمسه جنيه  هى ناقصة جفاف والكبير قاعد ولا همه .... الله  يرحمك يا أحمس كان زمانة شد الحصانين ودرجن درجن ساعتين زمن تلاقية قدام الملك بتاعهم وسيف يطلع وطيخ طاخ تراخ تلاقيه سلم وفتح الميه طوالى.
-       يا حلمبوحه أحمس ايه وبتاع ايه العملية محتاجه حوار وسفر هناك.
-       ما الحمير كتير وأكتر من الهم على القلب ما يروح بالطيارة حكمت يركب حمار يعنى.
-       حوار مش حمار يعنى محادثات وأخد وعطا مع الجانب الاثيوبى.
-       قعدة يعنى ودورين شاى ونفسين معمرين والصوانى تنزل بالهبر ولفة كبايات قرفه بعدها.
-       حاجة زى كده بس على مستوى مش زى ما أنت فاهم.
-       يعنى كاسات ميه صفرا مع حتتين خيار وطرنشات جبنة رومى وشوية سودانى.
-       با رااااااااااااجل أحنا الجانب بتاعنا ما لوش فى الحاجات ديه.
-   أنا أول مره أعرف أن أحنا بجانب ... أتارينى بأمشى أحدف شمال أنا قلت عيب فيا كويس أنك طمنتنى يااااااااااه  شوف الدنيا صغيره والله أنا كنت ها اروح المستفشى أعمل إشاعة وتحاليل على الجانب ربنا بعتك ليا أتارينا كلنا بجانب .
-        يا حلمبوحه اسمعنى لو عايز تفهم.
-   قول يا هندزة وسمعنى أحسن أنا دماغى مش محوء فيها حاجة وعمالة تلف وتدور مش عايزه تهمد من ساعة لما عرفت موضوع سد أزيوبيه ده .
-   أثيوبيا زى أى بلد افريقية لاحول لها ولا قوة وخاضعة لضغط إسرائيل ومسألة قفل الميه على مصر ده شغل إسرائيل من أيام جمال عبد الناصر والغرض منه إذلال مصر وقلقلة كيانها كدولة لها ثقل بالمنطقة.
-   ياااااااااه  من أيام أبو خالد وعدى علينا السادات وحسنى مبارك ولما يجى الراجل الطيب  السكره يقوموا ما يعملوش له حساب بالذمة ده كلام يا هندزة ، طيب ما يشخط شخطة كده ولا حتى يطلع على الهوا ويحلف طلاق تلاته لو اتحطت طوبة ليكون مفرغ خزنيتن فى الراجل بتاعهم ده وإن كان مش قادر يقول وأحنا نلم بعضنا وناخد مكروباز ونخليها دم للركب وما نرجعش إلا ومعانا كام أزيوبى رهاين.. يا عم أحنا شكلنا كده ها يجى يوم تلاقى الزومال تمنع عننا الهوا علشان يبقى الميه والهوا بأقول لك إيه يا هندزة؟ تشاركنى؟.
-       فى إيه يا حلمبوحه؟.
-       نعمل سد !.
-       سد إيه ؟.
-       سد الحنك يا هندزه ههههههههههههههههههه

 شد  وأكتم  وطلع من نخاشيشك وريح  ع الجانب بتاعنا  وسمعنى أغنية بأودعك