إعلان

الآن بجميع مكتبات مصر والوطن العربي --------->>>>> (( أحدث إصدارات الكاتب عادل إدريس المسلمي..... " الزناتي حنيفة -العجب ألوان - مقرمشات ساخرة " عن دار الراية للنشر والتوزيع ))<<<<<------


الثلاثاء، 20 ديسمبر، 2011

أنوس متياس حنك السبع


          يعتبر الأستاذ الدكتور المهندس اللواء المستشار أنوس متياس حنك السبع  ظاهرة فريدة  على مستوى العالم  لما يتمتع  من  ذكاء خارق وحنكة وفهم وكياسة موروثة أبا عن جد فوالدة رحمة الله عليه كان من ألمع لمعاء مصر المحروسة وجده رحمة الله عليه كان من أوجه وجهاء برمصر والشام ولهذا نشأ الأستاذ أنوس فى بيئة ثقافية عالية الجودة وكان لذكاءه المبكر الأثر فى تعلمة فقد نال بكالوريوس الطب  البيطرى تخصص طيور جارحة من جامعة توتالة بجمهورية هشتك بشتك فى عام 1980 وكان حينئذ يبلغ السابعة عشر من العمر وفى نفس العام حصل على بكالوريوس الهندسة الفراغية من جامعة سندوبيا تخخص فوارغ ثم التحق بالقوات المسلحة برتبة  لواء ومن فرط ذكاءه التحق بالدراسات الحرة بجامعة أيوه أيوه لدراسة القانون قسم حقوق أنسان ونال درجة الليسانس بتقدير أمتياز مع مخدة الشرف ونال درجة المستشار فور تخرجة وعين مستشارا لعدة محاكم فى أمريكا وأوربا وأفريقيا وآسيا وقد نال خمس دكتوراه متتالية فى الطب البيطرى عن مجموعة أبحاثه فى أم قويق والنسر الأقرع ونال درجة الدكتوراه فى الهندسة الفراغية عن رسالتة مردود الصوت من فوارغ  علب الكانز ثم ثلاثة دكتوراه فى القانون الدستورى والغير دستورى والنص نص.

          هذه نبذة مبسطة عن ثقافة الخبير الاستراتيجى عمنا وتاج راسنا أنوس متياس سد الحنك الذى يطالعنا يوميا بطلعته البهية فى جميع القنوات الفضائية والغير فضائية ليناقش ويفند الأحداث المتلاحقة فتارة تراه خبير أستراتيجى وتارة أخرى خبير عسكرى وتارة ثالة تراه خبير قانونى وتارة رابعة تراه طب شرعى وأخيرا لقد شوهد مرة فى أحدى القنوات الفضائية يفسر الأحلام والشىء الذى يحيرنى ويجعلنى أهرش فى راسى حتى صارات صلعاء كيف يتنقل أنوس متياس سد الحنك بين القنوات بهذه السرعة العجيبة هناك من يقول أنه يمتلك قوة خارقة كسوبر مان وهناك من يقول أنه يمتلك موتوسيكل يتنقل به ولكن أحد المشايخ المشهود لهم بقراءة الكف والفنجان والأتر قال أن هذا المتياس مخاوى جن معفرت هو الذى ينقله من مكان لآخر بسرعة تفوق الفمتو ثانية.

4 تعليق على “أنوس متياس حنك السبع”

  1. يا سلااااااااااااام
    كم هو رائع أنوسك المتياس هذا…
    وهل لديكم منه الكثير ؟؟؟
    من مال الله يا محسنين …
    تصدقوا علينا بشي كم متياس مما وهبكم الله …
    يا حرام :
    نحنا ما عنا غير متياس واحد هو الكل بالكل
    ألله يكون بعونه … البلد كلها على اكتافه
    وما عاد عنده وقت حتى للأكل …
    صار يشرب وبس
    حتى ماء ما عم يلاقي من كتر انشغاله
    بالآخر صار يتلفت يمين وشمال وما يلاقي غير دم الشعب … شو بدو يعمل هالمسكين .
    الله يكون بعونه شو إبن حرام وطيوب .
  2. فلنصبر يا أوركيد وسوف ننول الفرج من عند الله وفى القريب العاجل سنفرح وسيقشح الظلام بأذن الله وسنضحك وسنغنى أغنية الحرية فلكل ظالم نهاية ولن يتبقى إلا القليل أننا نبكى على كل شهيد قتل لينال غيره الحرية وعلى رأى واحد صاحبنا فاضل على الحلو دقة
  3. أول مرة أزور مدونتك القيمة .. تهنئتي لك على المجهود المبذول والرائع..
    لكم منى اجمل تحيه
  4. تشرفت فعلا بزيارتك وأشكرك جدا وأرجو المتابعة

الثلاثاء، 6 ديسمبر، 2011

رسالة الى المرحوم أبويا

الى : المرحوم الحاج أبويا
مدافن الامام - حوش العائلة
السلام عليكم ورحمة الله وبركاته
      أبويا العزيز الغالى كالعادة أنتظرتك أمام اللجنة نفسها ولم تحضر وقعدت من الساعة تمانيه الصبح لغاية الساعة تسعة بالليل  وأنا قاعد مستنيك لغاية لما جت الشرطة وجرجرتنى لبعيد وقالولى خلاص قفلنا الصناديق ، الناس أتلمت حواليا وأنا بأصرخ لغاية لما جه واحد طيب صعبت عليه وسألنى ولما عرف أنى مستنى أبويا علشان أشوفه قال لى يمكن يكون أسمه فى لجنة تانية الراجل الله يكرمه خدنى من أيدى لغاية شوية شباب طيبين قاعدين وقدامهم كمبيوتر وقالهم ساعدوا الاخ ده عايز يعرف مكان لجنة والده علشان كان مواعده ومالقهوش سألونى عن الرقم القومى بتاعه طلعتلهم البطاقة العائلية بتاعته لما شافوها ما تقولش طلعت بردية من بتوع الفراعنة كل واحد يمسك البطاقة ويقلب فيها  وش وضهر ويفتحها وجالهم حاله كده زى الدوخه  واحد منهم قالى أطمئن ها نبحث عنه بالأسم وكل شوية ألاقى واحد يقولى أسم زى أسمك بس لقب العيله مش هوه واحد منهم مسك الموبايل واتكلم فيه وما فيش دقيقتين ولقيت الراجل اللى وصلنى عندهم جاى بسرعة ومسك البطاقة العائلية بتاعة أبويا وخدنى على جنب وقال لى هو والدك ما طلعش رقم قومى قلت له لأ قال لى ده كلام مش خساره صوته يروح هدر كده ليه يا أبنى ما طلعش رقم قومى لغاية دلوقتى بصراحه ما عرفتش أرد عليه سألنى تانى قلت له أصله ما لحقش يطلع رقم قومى أبتسم ابتسامة عريضه وقال لى ليه هو الارقام القومية عندكم خلصت ولا أيه ! قلت له لأ، أصله مات من تلاتين سنه قبل ما يفكروا فى الرقم القومى الرجل ضحك وظل يضحك إلى أن التف حوله مجموعة الشباب متسائلين عن سبب ضحكه ولما عرفوا الحكاية هات يا ضحك إلى أن أخذنى الرجل الطيب بعيد وحط أيده على كتفى وقال لى هو والدك الله يرحمه كان بيجى ينتخب؟ قلت له كل أنتخابات بيجى والانتخابات اللى فاتت من سنة وشوية انتخب فى نفس اللجنة ديه ، سألنى وهو يبتسم وانت شفته وهو بينتخب قلت له آه قال لى معقوله! قلت له أمال يعنى أنا بأكذب عليك ولوأنا كذاب الحكومة كمان بتكذب روح شوف كشوف الانتخابات بتاعة الأنتخابات اللى فاتت واللى قبلها ولو كنت بأكذب يبقى قول عليا مجنون ، قال لى لأ لا سمح الله هو حد يقدر يقول عليك مجنون تلاقيه جه بس رجع لما عرف أن الانتخابات بالرقم القومى علشان كده أنت ما شفتهوش.
أبويا الغالى حاول تعمل بأى طريقة الرقم القومى، شوف عم حسنين التربى يسهلك الموضوع وأنا ها أراضيه بقرشين وها أنتظرك فى الإعادة قدام نفس اللجنة ولو ما لحقتش يبقى ها أستناك فى أى انتخابات جايه ما هى كتيره ، حاول لأنك وحشتنى جدا ونفسى أشوفك.
                                                                                                           أبنك الحائر

4 تعليق على “رسالة الى المرحوم أبويا”

  1. الله يرحم أبوك …
    وكل أموات المسلكيم يا ابني …
    أنا هضم صوتي لصوت الشباب اللي انت سألتهم عنه وأقوللك :
    كل انتخابات وعلى أبوك رحمة الله ورضوانه …
    بس تلاقيه يا ابني غير رأيه في الانتخابات دي وقال بينه وبين نفسه :
    مهم كلهم جايين عندي … أتعب روحي واروح لهم ليه ؟؟؟
    أما ييجوا … نبقى نتفاهم …
    ويحلها الحلال ربنا إن شاء الله .
    وأهو …
    كلها يومين …
    ما فاضلش كتير .
    ولك تحياتي
    أوركيد
  2. والله كلامك عين العقل وفات الكتير ومابقاش إلا القليل
  3. انا كنت مسؤل عن كشوف اللجان الانتخابيه في منطقتي وصدقني كتيييييييييييييييييييييييييييييير قوي كانت حالتهم زي حالة المرحوم الوالد الله يرحمه بس الحمد لله قدرنا نسيطر عاى الوضع ونعمل لهم لجان لوحدهم ومرشحيين مستقلين خالص
    ويقود الدعايه لهم الشيخ محمد ابو شردامه الله يرحمه عن طريق الوكيل الشيخ سحلول ابوقرصه
    وبتقبلوا كل يوم خميس عند الطرب
    نقرا الفاتحه على ارواح ابائنا وموتى المسلمين الله يرحمهم جميعا ( الله يرحمهم جميعا اصوتهم ياما نجحت ناس)
    كل تحياتي
    المسحراتي
    يتبع
  4. حبيب قلبى يا أبو السحر
    الله يرحم أمواتنا وأموات المسلمين
    كانت موتنانا يصوتوا عليهم عند الموت ويصوتوا هم بعد الموت فى الانتخابات
    ظاهرة نادرة تحدث بمصر فقط
    تحياتى ويتبع

الأربعاء، 30 نوفمبر، 2011

أركن عقلك وأمشى حافى



          لو لقيت يافطة معلقة مكتوب عليها MP وترجمتها موقف عقول حاول تشوف مكان تركن فيه عقلك ولو لقيت يبقى ها تكون من المحظوظين لأن كل المواقف كاملة العدد … أركن عقلك وأمشى على رجليك ها تستريح وها تشعر وأنت ماشى  أنك آخر روقان لأنك راكن عقلك ومعاه جميع مراكزه من شعور وأحساس وخوف وفرح ونزوات وغيرها من المراكز … صدقنى لن يرتفع ضغطك ولن ينخفض وأن كنت مريض بالسكر ثق تماما بأن سكرك لن يرتفع وأيضا لن ينخفض لن تفارق الأبتسامة شفتيك ستشعر بأن محلق فى دنيا ثانية ، ستتجول فى شوارع مصر المحروسة دون أدنى مشكلة لو قابلك واحد وشتمك أو ضربك أو حتى بصق فى وجهك ستضحك وها تعلى الضحكاية وأمشى وكمل مشوارك ولو حتى جاءت لك طوبة فى رأسك وسال دمك أكتمه بمنديل  وأضحك وعلى أقرب سيارة أسعاف روح وها يقوموا معاك بالواجب، أضحك وأنت بتتغرز، غرزة أتنين ولو حتى عشرة لأنك لن تشعر بأى ألم ، لن تسخط ولن تبكى على حالك ولو حد ثبتك بمطواه قرن غزال ولا حتى مسدس وقال لك هات اللى معاك  طلع اللى فى جيوبك وأنت بتضحك ولو حد قال لك شكلك مش عاجبنى وغزك بسيف ولا ستجة وطلع كرشك وحسيت أنك بتموت أضحك  وكركروأنت بتتشاهد .

خلى شعارك من النهاردة " أركن عقلك وأمشى حافى"
                                                                                عادل إدريس
                                                                            صاحب موقف عقول
                                                                                     وسط البلد



14 تعليق على “أركن عقلك وأمشى حافى”

  1. الموضوع حلو اوي عجبني موووووووووووت مشكووور
  2. أشكرك وبشده وارجو المتابعة
  3. مدونه قيمة
    وبوح راقي
    سلمت يداك
    تحياتي واحترامي
    شمس (الشام)
  4. أشكرك يا شمس على كلماتك وارجو متابعاتنا دائما
  5. ايه الحلاوة دي
    مدونتك جميلة ومنعشة شكرا لك
  6. شكرا لك من بعض ما عندكم
  7. اللـهم اٍنـا عـبيدُك .. بنوعبيدك ..بنو اٍمائك .. نواصِـينا بيدك .. ماضٍ فـينا حُكمك .. عـدلٌ
    فينا قضاؤك .. نسألك بكلِ اسم هـو لك .. سمّيتَ به نفـسَـك .. أو أنزلتـَهُ في كتابك .. أو
    عـلّمته أحـداً من خلقـِك .. أو استأثرت به في عـِلم الغـيبِ عندك .. أن تجعـل القرآن ربيعَ
    قلوبنا .. ونورَ صدورنا ..وجَلاء حُـزننا .. وذهاب هـمِنا وغـمِنا .
    وصلى الله على سيدنا محمد وعلى آله وصحـبه وسـلم.
  8. للأسف الشديد لقيت الموقف كامل العدد.!
    وأصلاً أصلاً الضغط عالي جاهز..
    وقلبي مكلبش في تلابيب عقلي بإديه وسنانه..
    يعني خنقة ما بعدها خنقة.!
    يعني يا أستاذنا ميئوس مني بعيد
    عن السامعين..!هههههه ضحكتني وانا
    ماليش نفس أأأأأضحك.!!
  9. موضوع رائع.. وكم السخرية فيهلا تضحك..
    بل تحفز المرارة علي الفقع ..!!
    هههههههه
    تحياتي لقلمك النابض الجميل
  10. شكرا للأخ زياد الصافى للدعاء الكريم واللهم آمين يا رب العالمين كم اثلجت قلبى بهذا الدعاء
  11. أختنا العزيزة فاطمة أحمد أضحكى ولا تيأسى والف بعد الشر على فقع مرارتك وأشكرك على تعليقك الجميل
  12. دونة رائعة وتحمل الكثير من السخرية ومانعيشه فى وقتنا الحاضر واتمنى المزيد والتواصل.
  13. كل ما هنالك إننا بحاجة لجرعة تبلد
    ربما حافظنا على أنفسنا مع كومة أمراض عصرية
    يا أخي …أخبرني شرط قبول ركن العقول ربما نتأهل لنهائيات الركن
    فقط أكد لي بأننا لن نحاسب على ذلك يوم يكون في الحساب عن الأمانات المحمولة و المركونة …!!
  14. الاخ سعد … شكرا على متابعتنا وأشكرك أكثر لو تابعتنا دوما
    الى حنين …. شروط قبول ركن العقول كما قلت لابد وأن نكون متبلدون بدرجة بليد جدا … واشكرك على المتابعة

الثلاثاء، 29 نوفمبر، 2011

يا سلام سلم العرسة بتتكلم

         آه العرسة بتتكلم واللى مش مصدق يفتح أى قناة فضائية مصرية ويشوف واللى مش غاوى تلفزيون يسمع راديو … سرسعة المذيعات أشبه بصوت العرسة كلهن أنقلبوا الى عرس تسرسع  وكلا بنغمته فهناك سرسعة نهاوند  وسرسعة بياتى وسرسعة سيكا وده تميز جديد وحصرى للمذيعات المصريات … أنا أعرف أن عمليات التجميل تجرى لتصغير أو تكبير أجزاء معينة فى الوجه أو الجسم بالسيلكون أما الجديد  أن السرسعة أصبحت موضة  مصرية وحصرية   الموضوع مش هزار ولا تهييس الموضع فعلا بجد فقد لفت أنتباهى أن هناك مذيعات معروفات بالاسم  كنت أشاهدهن منذ سنة تقريبا يتحدثن بالصوت المعتاد ولكننى لاحظت أنهن يتحدثن فى الآونة الأخيرة بصوت عرساوى فأندهشت وقررت أن أتصل بأحد أصدقائى من الأطباء  وأستفسرت منه عن هذا الموضوع فقال لى أن هناك مرض ظهر مؤخرا يصيب مذيعات التوك شو  المصريات ويصيبهن فى أوتار الحنجرة ويسمى سربوسيا الحنك وترجمتة حشرجة الحنك  وخطورته هو التحول من صوت نسائى ناعم إلى صوت دكر وشرح لى أن العملية تتم بخطوات  فقط تذهب المذيعة للطبيب المختص وتختار نوع السرسعة من كتالوج الصوت وتسجل صوتها العادى وبالكمبيوتر يتم الوصول الى الصوت المطلوب ثم تتم العملية بأن يقوم الطبيب بأستخراج حنجرة المذيعة وصنفرتها  ووضعها فى محلول مركب لمدة ساعة ثم يتم عمل فتحة بسيطة فى الحنجرة يوضع بها  سيكس بلف وجلبة صغيرة  ويربط بالجلبة منظم للصوت  وفى غضون ساعتين تتحول الى عرسة تسرسع وعندما سألته هى العمليات ديه بتتعمل فى أوربا وأمريكا قال لى  بتتعمل بس بالعكس يعنى أحنا فى مصر بنعملها للستات ولكن هناك بتتعمل للرجالة المتحولون …. افتح التلفزيون وأسمع وأتأكد لو مش مصدق.


5 تعليق على “يا سلام سلم العرسة بتتكلم”

  1. يمكنك الان ان تتواصل مع طبيب اون لاين مجانا فقط ادخل موقعنا واضغط على طبيب اون لاين
    الطبيب متواجد يوميا من 7 - 10 مساء بتوقيت السعودية
    سبت واثنين واربعاء - اخصائى التجميل و صيدلى خبير
    احد وثلاثاء وخميس - استشارى اطفال
    http://www.nahdicare.com/
  2. شمس المغيب قال: يناير 6th, 2012 at 11:10 م
    ابتسامة …. جميل جدا الطرح الرائع
    والاجمل الاسلوب المميز الجميل
    ورائع مصطلح الصوت العرساوى دا …
    راقت لى كلماتك الرائعة.
    دمت بخير ودام رقى قلمك
    :: خالص تحياتــى :::
    شمس المغيب المصــرية
  3. الى الاخت شمس المغيب
    أشكرك على تعليقك الراقى الجميل وأشكرك أكثر لاهتمامك بقراءة ما أكتب
  4. السلام عليكم
    معلومات جدا قيمة يعني بالاضافة للشكل كمان الصوت ياساتر
    اتسائل
    الفراعنة حنطوا المصريين القدامى
    طيب القوانين مين حنطها والاشكال اياها ليه مااخدوها مجانا ؟؟؟
    شكرا اخ عادل المبدع
  5. زهور الريف … التحنيط أصبح موضة قديمة وتتم للموتى لكن الجديد هو “التحويط “لمن على قيد الحياة ويفضل متحوط لغاية لما يسلم ويقول أنا اللى جبته ده كله لنفسى .
    شكرا على الجوله الحرة التى تقومى بها للمدونة.
    وشكرا على أهتمامك البالغ بكل كلمة وحرف

الأحد، 4 سبتمبر، 2011

أنا كل ما آجى أجف أجع


كتبهاadel edris ، في 4 سبتمبر 2011 الساعة: 11:50 ص

            ومعناها بالصعيدى " انا كل ما آجى أهم أزقلط  " وأهه كل وقوع والشاطر اللى يقع ويقوم بسرعة ولكن شكلنا كده مش ناويين نقوم بسرعة … فى حاجة محيرانى زى الفار اللى محتار من القط  لا القط عايز يلتهمه بسرعة ولا عايز يسيبه ، زنقه فى ركن ومبرق عنيه والفار عمال يتنفض والعرق نازل منه  ولما سألوا القط ليه بتعمل كده قال مزاجى وأنا حر فيه.
          وده اللى بيحصل بالظبط حاليا فى مصر الثورة كل ما الامور تهدأ ونقوم نشم هواء الاستقرار يطلع لينا أئتلاف يعلن عن مليونية يوم الجمعة حتى أصبنا بتخمة المليونيات ، جاء شهر رمضان وحجبت المليونيات على مضض من الائتلافات فالود ودهم أن يكون هناك مليونية طوال الشهر الكريم وهناك من أقترح أن تعد مائدة إفطار هى الاولى من نوعها من حيث العدد وهناك من صرح بأن مؤسسة جينس العالمية سوف تشهد الحدث كرقم قياسى عالمى وقد عدت العدة لهذا الحدث وتم رسم خارطة طريق للمائدة بأن يكون ميدان التحرير هو منتصف المائدة وتتفرع لعدة فروع بشوارع القصر العينى وطلعت حرب وقصر النيل وميدان عبد المنعم رياض وشارع التحرير وكلها تتلاقى فى ميدان التحرير وقيل أنه تم الاتفاق مع طائرة هليوكوبتر لتصوير الحدث ولكن لم يتم الحدث لتدخل عدة تيارات بمنعه ومر شهر رمضان دون مليونيات وجاء عيد الفطر أيضا دون مليونية وإن ظهر فى الافق أئتلاف جديد أراد الظهور وأعلن عن مليونية ثانى أيام العيد وأطلق عليها "مليونية العيدية " ولكن باءت بالفشل الذريع ووقف المأتلفين أصحاب هذا الائتلاف بالميدان والحسرة على وجوههم وهم يصرخون " خيانة خيانة … حد ضرب فينا زمبة" وقامت معركة بين هؤلاء وبين بائعى الاعلام فبائعى الاعلام عندما علموا بأن لا مليونية ولا يحزنون سارعوا لشباب الائتلاف الجديد وعنفوهم بشدة فكيف يعدون عدتهم من الاعلام وتلغى المليونية فالخسارة فادحة وخاصة أنهم جهزوا صفارات عليها علم مصر كتقليد جديد وزادوا من بضائعم خاصة بأن المليونية فى العيد والاقبال سيكون كبير على الشراء ولكن خابت الأمال ولم تنتهى المشادات بينهم وبين شباب الائتلاف الجديد إلا بعد أن جاءهم نبأ مؤكد بأن بعض الائتلافات قرروا اعداد العدة بمليونية يوم 9 سيتمبر تحت مسمى  يوم الغضب  ويأمل بائعى الاعلام تعويض خسارتهم ونأمل نحن أن لا تتم هذه المليونية …. سؤال أهبل من أهبل فى زمن الهبل هل بائعى الاعلام هم أصحاب المصلحة فى هذه المليونيات ؟ يا اخونا أنا كل ما آجى أجف أجع.


7 تعليق على “أنا كل ما آجى أجف أجع”

  1. ايه المدوته اللذيذه دى
  2. مدونة جميلة اوووووووووووى وموضوعاتها متنوعة وشاملة
  3. ايه المدونه اللذيذه دي
    لكم منى اجمل تحيه
  4. شكرا على تعليقاتكم وأرجو المتابعة والمشاركةمعنا ولو فى موضوعات للنشر أرسلوها
  5. تسلم ايدكم
  6. أصحاب الإعلام هم من يخدعونا بالمليونات ويأخدوا هم الملايين
    ومعاها كمان بالونات ..أما إحنا فلينا يادوب الشخاليل والمليمات .

    والظاهر من غير ماندرى مصرين وحالفين نقول للى مايدرى إنه اللى مايتسمى وسممنا وسمم أفكارنا من غيره .. كل ما نيجى نقف نقع .
  7. الاخت الكريمة منارة المعرفة: مونى
    سعدت بتصفحك المدونة من أول الجلدة .
    تعقيبك بالزجل المسجوع جميل وفى صلب الموضوع
    وتحياتى

الثلاثاء، 16 أغسطس، 2011

حد يزمر له فى ودنه


       هذا المدعو موريس صادق  رئيس الجمعية الوطنية القبطية الامريكية الشعبية الاشتراكية المتحدة من وجهة نظرى عنده شعرة ساعة تروح وساعة تيجى ينام ينام ويطلع علينا بجنانة، فقد قرر أن يعتصم أمام السفارة المصرية بواشنطن ومعه عدد من أقباط المهجر وده ليه ؟ أقولك ليه الراجل عايز طلب بسيط قوى يعنى طلب صغنون قدر النمنمة عايز فرض الحماية الدولية على مصر وناوى يجمع مليون توقيع لتفويض بابا الفاتيكان للقيام بهذه المهمة… أرجوك لا تضحك ولا تخنفر ولا يصدر من فمك صوت نغمة أسكندرانى طويلة ، من حقة يعتصم ويطلب اللى يطلبه بس اللى مزعلنى انه ها يعتصم فى بلاد العم سام ما ميدان التحرير موجود يجى هو وحبايبة والميدان واسع ويرفع أكبر لافتة نكتبهاله بالخط الكوفى ونشيلها معاه ونعمله أكبر وأعلى مسرح يقف عليه وخمسين ميكرفون ليقول عايزين حماية دوليه على مصر ونلحن له حنة لزوم الليلة مطلعها " عايزين إيه … عايزين حمايه دوليه … ودى نجيبها منين … من عند شحته بتاع الطعمية " ونسيبه يقول يومين تلاتة لغاية لما يطلع العفريت اللى لابسه ولو مش عايز يجى ومصمم يبقى فى بلاد العم سام  تخوفا من اللى ممكن يحصله من أخواننا أقباط مصر قبل مسلميها نقول له لا تخف طالما تحمل الحصانة الطبية شهادة معاملة الأطفال.
      يا أخوانا لقد قرأت التعليقات التى وردت على الخبر المنشور فى اليوم السابع وكان من ضمنها تعليقات من الاخوة الاقباط وقد أتهموه بالجنون … وبصراحة الراجل ده علاجة عندى بس حد يناولهولى ويمسك لى ودنه الشمال وأنا أدخل فيها المزمار وأزمر فيها وأغني له ماما زمانها جايه .

السبت، 13 أغسطس، 2011

هل كانت سحابة سوداء أم غازات الخمول

        كل سنة وأنتم بخير ورمضان كريم، فى الحقيقة انا كنت مش عايز اكتب أو أعلق على أى حاجة ولكن هناك من يغيظك ويطلعلك لسانه ويخليك تطلع من هدومك وتمشى بلبوص وتشاور عليك الناس  وتقول آدى اللى  خدناه من الدولة المدنية  هو أحنا لسه شفنا حاجة ويا سلام لو تلقف أثنان أو ثلاثة خيط الكلام  ها تسمع أحلى الكلام ، اللى يقولك هما عايزنها مدنية علشان الكل يتسرمح بمزاجة واللى يقولك  الشباب عايز الدولة المدنية علشان يبوس ويحضن على مزاجة فى أى مكان حتى ولو فى وسط الشارع ، أهم شىء ما حدش يقوله عيب ويزعجه زى بلاد بره … أما أحسن تعليق سمعته كان من أحد الشباب  عندما قال مصر أتأخرت خالص يا عمو كان من المفروض تبقى مدنية خالص من يجى عشرين سنة على الاقل وعلى فكره يا عمو ما كنتش ها تسمع عن حوادث اغتصاب اطلاقا لأن كل الشباب ها يكون عنده جيرل فرند تعيش معاه …. غاظنى هذا الشاب ليس لأننى ضد الدولة المدنية لا سمح الله ولكن لأننى أصبحت كهلا  ولن أنعم بجنة الدولة المدنية.
         ملينا من الكلام عن الاستقرار والدولة المدنية  والرؤوس صارت موجوعة ، دلوقت لو مشبت قدام أى صيدلية تلاقى سيارات شركات الادوية بتنزل أدوية الصداع وضغط الدم بدلا من أدوية المنشطات الجنسية اللى كانت ماشية آخر حلاوة وخصوصا أيام الثورة كله كان فرحان بالثورة وفى أستطلاع للرأى أثناء الثورة لم تقع إلا ثلاث حالات طلاق وعلى غير العادة عادت آلاف الزوجات اللآئى تركن أزواجهن قبيل أندلاع الثورة إلى بيوتهن  ولهذا صار حزب الكنبة هو أنشط حزب مشارك بفرحة الثورة  فقد قال لى أحد الأصدقاء الذى لا أثق فى كلامه ولكن شغلنى ما قاله  بأن السحابة السوداء التى كانت تغطى سماء أنحاء مصر ما هى إلا غازات تؤى الى الخمول والضعف  وتؤثر على  شباب ورجالات المحروسة   وهى من أفعال النظام السابق وهذه الغازات تؤدى إلى الضعف الذى أصاب الرجال بالمحروسة وجعلهم يناموا فى العسل  وذلك حتى ينشغل رجالات المحروسة بهمهم الكبير ولا يتكلمون فى السياسة ويرتاح رجال النظام من وجع الدماغ ،  أنظر كم العيادات التى فتحت لعلاج العقم والضعف الجنسى أنظر كم الاعلانات بالصحف والقنوات الفضائية التى تستعرض الادوية المنشطة  ،لقد أصبح لقب بركة هو السائد بين الرجال بالمحروسة فتجد من يشاور على أحد الرجال  قائلا انه راجل بركة أو من يذيع بين أصدقائه مفتخرا بأنه أصبح بركة .
والآن وقد تخلصنا من أفعال النظام السابق ولم تعد هناك غازات خاملة ترش فى الجو وسيهدأ البال وسيعود الاستقرار بأذن الله  ولن يكون هناك رجل نائم فى العسل ولا أحد سيكون بركة ولكن السؤال هل سنقترب يوما ما من عدد سكان الصين؟ .

الأربعاء، 27 يوليو، 2011

مين اللى عطس أنت لأ أنت لأ

يبقى لازم فى حد غريب هنا ، فتشوا فى الميدان لازم يظهر ويبان .
        ما هو مش ممكن اللى بيحصل ده ! معقولة كل ما تهدء الأمور شوية حد يزود النار ويشعللها فى حد عايزها مشعلله على طول ، عموم البشر بالمحروسة اللى قاعدين على الكنبه كما يحلو لمعشر الائتلافات أن يسموهم بحزب الكنبة فى حالة بلبلة وضيق فى التنفس مع انخفاض فى درجة الفهم وأرتفاع فى ضغط الدم هؤلاء المكوعين على الكنبة أو المهمشين عمدا  مع سبق الإصرار والترصد باتت عقولهم تتفكك فص تلو الفص حتى أصبح أشدهم تماسكا لديه فص ليمون خالى العصير أى أن العقل أصبح آيل للسقوط شهيدا فى ميدان الخازندارة .
      أصبحت مليونيات يوم الجمعة من كل أسبوع صداع يضرب فى النافوخ فيشرخه ولا ينفع معاة لحام الاوكسجين ولا حتى خلطة خرسانة أصبح يوم الجمعة خارج حسابات أى أسرة تريد أن تتزاور أو تتنزه واللى عايز يتفسح يبقى الأضمن ياخد لفه فى ميدان التحرير وها يلاقى كل وسائل الترفيه من أكل وشرب وهناك من أشترى بلح رمضان من الميدان وممكن تشترى لبس العيد من هناك .
     أصبح الناس فى ريف وصعيد مصر يتذكرون الحدث مقرونا بأسم المليونية فيقال أن فلان خلف أبنه فى جمعة الصمود أو فلان طلق مراته قبل جمعة الحسم بيومين أو فلان يشتكى فلان للعمده لأنه أستلف منه عشرة جنيه من جمعة الغضب التانية ولم يردها له حتى الآن .
     نحن شعب طيب بطبيعته جميعه كان فرحان بالثورة وبالشباب اللى أشعلها وبكى على الشهداء  اللى ضحوا بأرواحهم فى سبيل الحرية التى كنا نسمع عنها فى الكتب والافلام الاجنبية ، ولكن هناك من قام بسرقتة الثورة دون أن يدرى الشباب بذلك والسرقة تمت بفعل فاعل ألم يعلم الجميع أن أمريكا واسرائيل تجاهد فى الميدان لبث الفرقة والتشتت لا تريد الاستقرار لأنها تعلم أن الاستقرار لمصر يعنى الذعر لأسرائيل أن امريكا واسرائيل يبذلان قصارى جهدهما وبأى طريقة أو أسلوب لوضع العراقيل أمام أستقرار مصر وهناك للأسف الشديد من يوجد  بيننا  يساعدها بأخلاص  الاعلام الامريكى والغربى المنساق ورائة فى ظاهره أنه مع الثورة ونهضة مصر وفى باطنة مستنقع ينضح بالدمار الشامل لأستقرار مصر.
       خدها ودورها فى راسك كام لفه وطلعها ونشفها بفوطة ناشفه وبص عليها ها تلاقى كلامى مظبوط ولو مش مصدق هاتلى نص رغيف طرى أحلفلك عليه وأقطعه على راسى وأصور نفسى بالفيديو وأبعتهولك على اليوتيوب ولو برضه مش مصدق تبقى تستنى لما تشوف بعينك المعجنة اللى ها تحصل وساعتها ها تقول كنتى فين يا لأه لما أنا قلت آآآآآآآآآآآآآآآآآآآآه.
      أخاف أن نظل هكذا لسنوات طويلة مليونيات كل يوم جمعة ولكن المشكلة التى ستواجه مصممى وحاشدى المليونيات هى أختيار الأسماء المقترنة بالمليونيات فهل سيجىء يوم جمعة ونفاجأ بتسميته جمعة (سد الحنك) .

الأحد، 24 يوليو، 2011

الدبة اللى قتلت صاحبها

        يحكى فى قديم الأزمان  أن رجلا وجد دبة واقعة فى حفرة فأنقذها فتصاحبا وسارت معه حينما يذهب وفى أحد الأيام أثناء سيرهما معا أحس الرجل بتعب شديد فجاء تحت شجرة ليستريح فغلبه النعاس فجلست بجانبة الدبة وكانت هناك ذبابة تقف على وجهه فلاحظت ذلك الدبة فأبعدتها بيديها مرات عديدة حتى ينعم الرجل بقسط من النوم ولكن الذبابة تصر على الوقوف على وجه الرجل فأغتاظت الدبة من الذبابة ففكرت فى قتل الذبابة فذهبت وأحضرت حجرا كبيرا وظلت ممسكة به فجاءت الذبابة ووقفت على وجه الرجل فرفعت الدبة الحجر بيديها لأعلى وهوت به على الذبابة فطارت الذبابة قبل أن يصيبها الحجر ولكن الرجل مات فعندما أيفنت الدبة أن صاحبها قد مات ظلت تبكى وتبكى إلى أن تقابلت مع قرد فسألها عن سر بكائها فقصت عليه ما حدث فضحك القرد وظل يضحك والدبة تبكى إلى أن جاء حمارا فسأل القرد عن سر ضحكه وسأل الدبة عن سر بكائها فوقف صامتا لم يضحك ولم يبكى فسأله القرد ألم يضحكك الموقف فلم يرد فسألته الدبه ألم يبكيك الموقف فلم يرد وسار الحمار ومن خلفه القرد يضحك والدبة تبكى فجاءت كل القرود من الغابة ومشت مع القرد تضحك وجاءت الدببة ومشت مع الدبة تبكى والحمار أمامهم يسير صامتا ، فلما شاهد الغراب هذا الموكب  قال فى نفسه ويحك يا حمار تزفك القرود وتضحك وتمشى خلفك الدببة وتبكى وأنت تسير واثق الخطوة تمشى ملكا.
        هذا ما يحدث حاليا بالمحروسة هناك من يبكى على حالها وهناك من يضحك على ما يحدث وهناك من  يقف صامتا لا يعرف حقيقة ما يدور فالذى يبكى والذى يضحك يعرفون ما يدور فى الخفاء أما من ظل صامتا فهو الضحية.
        لقد قلنا من قبل أن رموز الفساد لن تهدأ إلى أن تجد لها مخرجا ينقذها من حبل المشنقة فهى تملك المال ولديها ذيول وأذناب وستحاول مرة تلو الأخرى إلى أن تنجح ولن يفطن لذلك أحد فهم يستخدمون آليات أمريكية وصهيونية لتنفيذ مخطط الهروب الكبير فإذا لم يعرف شباب الثورة أنهم على شفى التشتت والأنهيار فسوف تعود هذه الرموز وتحكم من جديد.
أن كل ما يدبر من أعتصامات ومسيرات وكل ما يحدث من بلبلة ووقيعة بين الشعب والجيش والشعب ونفسه هو من عمل الشياطين الزرق ، عودوا وتماسكوا وإلا سنسير خلفكم فينا من يبكى وفينا من يضحك.

الجمعة، 22 يوليو، 2011

أبتسم أنت فى بحر الظلمات

أسمحولى أن أستخدم طريقة مذيع قناة الجزيرة  فيصل القاسم:
هلللللللللل أصبح الميدان مولد وصاحبه غايب ؟ هللللللللللللل أصبح الميدان الهايد بارك على الأرض المصرية؟.
إذا أردت أن تتعرف على وجهة نظر المعتصمين بالميدان بعد تشكيل  الوزارة الجديدة ستجد نفسك  تائه  فى بحر الظلمات لكل واحد رأى حسب وجيعته ولكن هنك مبدأ واحد يتفق عليه الجميع وهو   محاكمة قتلة الشهداء والقصاص منهم .
الكثير ممن فى الميدان يصرون ويهتفون برحيل الدكتور عصام شرف  رغم أن الدكتور عصام شرف أتى على رأس الحكومة بعد أن حمله الثوار على الأكتاف وهم من طالبوه بتشكيل الحكومة  يعنى هو أصلا وليد الميدان .
وأردت أن أتعرف عن قرب على هذا الأصرار من قبل المعتصمين  وكان لى هذا اللقاء السريع مع أحد المتواجدين وقد لاحظت عليه الحماس الشديد وقد سألته مباشرة … ليه بتطالب برحيل الدكتور عصام شرف  ؟ فكان رده … ما تسألنيش ليه … أنت عارف وأنا عارف وكللللللللللللللللل الناس اللى أنت شايفها فى الميدان عارفه ليه … وقد سألته : بس أنا مش عارف وعايز أعرف فكان رده …   يا باشمهندز بقى أنت الوحيد اللى مش عارف ليه والناس دى كلتها عارفه … معلهش مش ها أقولك ليه … روح أسأل حد تانى … وبعد أذنك سبنى أشوف شغلى  ولكننى أردت أن أستفذه  فقلت له  طيب ها أسيبك تشوف شغلك بس أعرف هو شغلك أيه داخل الميدان  … أستشاط غيظا ونظر إلى بغيظ مكتوم وأخذ يضرب كفا بكف وطوح رأسه يمينا ويسارا ثم قال…  حتى دى مش عارفها! …. لما أنت مش عارف أنا بأشتغل هنا أيه يبقى جاى الميدان أساسا ليه؟!.
أنصرف وهو يقول … قال ليه قال .
وقفت مندهشا وإذا بأحد المتواجدين بجانبى يزيح حيرتى عندما قال لى أنت هنا فى بحر الظلمات ولن تستطيع أن تجد إجابة شافية لتساؤلاتك … أبتسمت له وقلت …. بحر الظلمات …. يا لطيف اللطف يا رب.

2 تعليق على “أبتسم أنت فى بحر الظلمات”

  1. صحيح بعد الثورة إنكشف المستور .. وعينك ما تشوف إلا النور …!!!!!!!!!! عرفنا إن السياسه بحر من الاعلى ما أجمل منظره وما اروع شواطئه ولكن بداخله يوجد ما لا يخطر على بال أحد ولا عين رأيت ولا إذن سمعت .
  2. الاخت مونى
    اراك جايبه المدونة من أولها وهذا شرف عظيم لى وسوف تتماشين مع الحدوته .
    تحياتى لك وبارك الله فيكى

الخميس، 21 يوليو، 2011

الباشا عايزها مدنية بلا مرجعية

قابلته مصادفة أثناء ترجلى بميدان التحرير الرجل يلبس ثياب متسقة زاهية الالوان تبدو ملامحه من أنه من الطبقة الميسورة الحال أعتقد أنه فى العقد الخامس من العمر ذو شعر كثيف ناعم لا تظهر به أيه خصيلات بيضاء وقد لفت أنتباهى أن عيناه زائغتان تعسس هنا وهناك شدنى حب الأستطلاع أن أتحدث معه فكان هذا الحديث:
-        مساء الخير.
-        مساء النور قالها وهو ينظر إلى بأستغراب.
سألته :
-        سيادتك من أئتلاف أو حزب معين؟ 
سكت للحظات ثم سألنى :
-        حضرتك صحفى؟.
-        كان ردى لا والله مش صحفى .
-        أبتسم أبتسامة خفيفة وقال لى يبقى حضرتك من منسقى الثورة ولا
         من حزب معين.
      لا من ده ولا من ده.
ضحك وقال لى :     
    -      يعنى غاوى الميدان مثلى.
ضحكت بصوت عالى وقلت له :
    -      هو هنا فى ناس غاوية وناس محترفة؟.
ضحك وقال بثقة :
 شوف يا أستاذ … قلت له عادل … عادل إدريس قال :
   -     تشرفنا يا أستاذ عادل إدريس … شوف يا أستاذ إدريس لو عدينا اللى فى الميدان حاليا ستجدهم حوالى الألفين منهم 500 بياع ودول ظاهرين أوى فى الميدان ومش محتاج أشرحلك دول بيبيعوا أيه لأنك شايفهم بوضوح وباقى الموجودين منهم قول 500 أو أكتر ناس غلابه من عشوائيات مصر دول قاعدين على طول وفعلا ليهم طلبات بس رابطين نفسهم بالاحزاب والأئتلافات المختلفة لعلهم ينالوا نصيب من طلباتهم المعقولة كالسكن وخلافه من متطلبات الحياه وبصراحة هما دول اللى بينزلوا الميدان أول ناس لما يكون هناك مليونيات لأن عندهم اللى يخليهم ينزلوا وعلى فكرة شباب الثورة بيعتمدوا عليهم إعتماد كلى فى كل حاجة من الوقوف فى مداخل الميدان وعمليات التفتيش وتنظيم المرور وأنا شايف أنهم فعلا عيال جدعان وقت الشده وعندهم عزيمة قوية وأتعلموا من شباب الثورة الكثير والعدد ده بيزيد وقت المليونيات أما المتبقين فى الميدان القليل جدا منهم من الأحزاب والائتلافات المختلفة وهم بييجوا فى شكل ورديات للظهور وأثبات الوجود ويزدادوا لو فى حاجة حصلت أو لترتيب المليونية وكلهم عندهم أشغال بيعملوا فيها وباقى الناس اللى أنت شايفها ديه جزء منهم المتسولين اللى كانوا بيناموا على الارصفة والبوليس بيمسكهم بالليل ودلوقت بيناموا مستريحين وفى أمان ولو جدع تقدر تقرب على واحد منهم يقوم عليك كل دول ولو قلت عليه ده متسول يرد عليك متين فى نفس واحد … ما ده من عمايل النظام السابق اللى خلى كل دول يتسولوا ! وجزء جاى بيتمشى وهم من الشباب اللى خلص الامتحانات وفاضى وجزء جاى يزور التحرير لأول مرة وجزء قليل جدا غاوى التحرير من بعد الثورة.
-        تقصد اللى زى سيادتك يا أستاذ ….
-        أسمى إسماعيل … إسماعيل خيرى.
-        تشرفنا يا أستاذ إسماعيل وسيادتك بتيجى كل يوم الميدان؟.
-        تقريبا أنا بأعتبر الميدان بالنسبة لى فسحة جميلة وبأعرف منه
         تطورات الأحداث أولا بأول وبأعرف اللى بيدور فى ذهن الناس.
-        طيب أنت شايف أن وجود الاعتصامات فى الميدان حاجة كويسة ولا
         أنت شايف أيه؟.
-   فى بادىء الأمر كان ضرورى من تواجد الناس فى الميدان وإلا كانت الثورة ستفشل فشل ذريع وسيعود النظام السابق دون أن يدرى أحد وتعود ريما لعادتها القديمة يعنى تواجد الناس فى الميدان كان البعبع اللى بيخوف فلول وأذناب النظام… لكن دلوقت أصبح التواجد فى الميدان ليس له جدوى وبصراحة حاجة محيرة الناس مش عارفه تعمل حاجة ومش مخلينهم يفكروا.
-        تقصد إيه بالناس؟.
-   أقصد الحكومة وبعدين ما اللى فى الميدان هما اللى أختاروا عصام شرف ودلوقت أنقلبوا عليه الناس فاكرة أن مصر ها تكون حلوه وجميله فى شهر ولا اتنين دى عايزة عملية تجميل تحتاج من خمسة لعشر سنين… النظام السابق خلص على مصر وخلى ووشها زى قفاها مطموس مش باين ليها مناخير من بق وعدمها العافيه ومش قادرة تمشى حتى على عكاز يعنى عايزة كونسلتو من جميع التخصصات وعايزة نقل دم وعايزة وعايزة وأهم شىء عايزة الناس تصبر عليها شوية دلوقت وزى ما سمعت طلع تغيير وزارى قامت الدنيا وقعدت على وزراء مترشحين وكانوا فى الطريق لأداء اليمين رجعوا من وسط السكة علشان مائة واحد  ولا متين قالوا مش عايزنهم دول كانوا من النظام.
-        ما الناس برضه معذورة يا أستاذ إسماعيل.
-       معاك بس مش بالطريقة ديه معنى ذلك أن ما فيش وزير ها ينفع لغاية
         لما تقوم القيامة.
-        مش فاهم.
-   يا أستاذ إدريس كل الناس اللى موجودة فى مصر ألان حتى اللى موجودين فى الميدان والاحزاب والائتلافات من النظام السابق اللى أشتغل فى زمن النظام يبقى من النظام ، لو مشى أى حد من رجالات النظام السابق فى شارع يبقى الشارع كله من النظام واللى سلمه مبارك جائزة سواء تقديرية أو تشجيعية يبقى من النظام.
-        والحل أيه من وجهة نظرك يا أستاذ أسماعيل؟.
-        الحل يستوردوا وزراء من الصين.
-        ههههههههههه معقوله نستورد وزراء!.
-        ما هى حاجة تحير البلد وقف حالها تماما.
-        تقصد عجلة الانتاج.
-       الانتاج بس ده كل حاجة والخطورة كبيرة وما فيش حد حاسس بذلك   
        إلا  إسرائيل هى الوحيدة المستفيدة ما هو كل ما تضعف هى تقوى
        والعكس.
-        بس فى ناس بتقول أن عجلة الانتاج متوقفة من قبل الثورة وكثير من
         الكتاب والمفكرين قالوا ذلك.
-        تقصد الدكتور علاء الأسوانى.
-        أنا لم أسمعه يقول ذلك.
-        لا هو قال كده وقال هى فين العجلة ديه يعنى عايز يقول الحال واقف
         واقف .
-        بس أنت شايف الحل أيه؟.
-        الحل الناس ديه تمشى ولازم نشوف حاجة تشغلهم مشروع كبير الكل
         ينشغل فيه.
-        طيب والناس ديه لما تمشى أنت ها تتفسح فين؟.
-        ههههههههه يا سيدى بس الناس تمشى ويحلها الف حلال صحيح ها
         أزعل لأنى أصبحت مدمن الميدان.
-        للدرجة دى!.
-        أيوه وعلى فكرة أنا مش متفائل بأن الميدان ها يفضى مهما حصل.
-        إزاى؟.
-        طالما ما فيش يد قويه يبقى الميدان ها يفضل مليان.
-        أنا ملاحظ إن الميدان بدأ يمتلأ.
-        فعلا ما الساعة دلوقت دخلت على العاشرة مساء وده الوقت اللى
         الشباب من كل حته بيجى يتمشى ويدردش ويفجر طاقته.
-        بس أنا ملاحظ أن فى بنات وستات بدأت تتواجد وبشكل كتير.
-        وماله ما هما دول برضة من الشعب وبيثبتوا وجودهم.
-        بس زمان ما كنش فى بنات ولا ستات ممكن تتواجد فى الوقت ده
          لما هما لسه واصلين أمال ها يمشوا أمتى؟.
-        الوقت ما بقاش مهم فى أيام الثورة ثم أحنا فى عصر غير العصر 
         يعنى دلوقت الحرية أصبحت ملاذ للجميع.
-        معنى ذلك أنك من مشجعى الحرية بلا حدود.
-        ولما لا كل واحد يعمل اللى يعجبه ما دام لا يؤذى أحد.
-        معنى ذلك أنك بتشجع الدولة المدنية ولا الدولة الدينية.
-        بالنسبة لى أنا أشجع الدولة المدنية وبدون مرجعية دينية.
-        بدون مرجعية دينية إزاى.
-   المقصود بالمرجعية الدينية يعنى كل واحد ودينه هو اللى يحكمة، المسلم دينه الاسلام والمسيحى دينة المسيحية واليهودى دينه اليهودى والبوذى البوذيه والوثنى الوثنية يعنى تقدر تقول دولة مدنيه بمرجعية كوكتيل أديان يعنى لازم القاضى يقعد على المنصة ومعاه كل أمور الاديان حتى يحكم وفقا لديانة المتهم.
-        وليه ما نقولس دولة مدنية بمرجعية دين الاسلام.
-        ها يقولوا دى ها تبقى دولة إسلامية والاخوان هما اللى بيحكموا هما 
        والسلفيين وها تحصل مشاكل والناس تروح ميدان التحرير وتعتصم 
         تانى.
-        طيب أنت من وجهة نظرك تريدها دولة مدنيه ليه.
-        أنا طول عمرى كنت عايش فى أوروبا وأحب مصر تبقى زى أوروبا 
        تعمل اللى أنت عايزة بحرية تامه طالما ما بتضيقش غيرك.
-        سؤال محرج ممكن.
-        أتفضل.
-        أنت متزوج.
-        لأ وهو ده السؤال المحرج.
-        يعنى.
-        أنا غير متزوج وما أظنش أنى ها أتجوز.
-        ياه قد كده بتكره النساء.
-        أنا لا أكره النساء بل أحترمهم ولكن أنا لا أميل للنساء بل أميل أكثر 
          للرجال.
-        تقصد صداقتك للرجال أكثر من النساء.
-   بمفهومك أنت أيوه ولكن بمفهومى أنا صعب أن أشرح لك لأنك قد تنفر منى فى لحظة رغم أنك متحمس للحديث معى وأمضينا أكثر من ساعة نتناقش.
-        مش فاهم…  ممكن توضح كلامك.
-        ممكن تفهم كلامى بعد قيام الدولة المدنية وساعتها ممكن لا تندهش
         ولا تنفر منى.
سرحت للحظات وأيقنت أننى فهمت قصده ونظرت إليه ولكنه أزاح حيرتى بسرعة عندما قال لى :
-       أرجو أن تكون قد فهمت قصدى ، مش قلت لك أن مشكلاتنا نحن العرب
        أننا نأخذ الأمور من منظور رجعى.
-        بس الرجعية أحيانا تكون نتيجة من الوازع الدينى.
-     ههههههههه مال الدين ومال الحرية الشخصية ثم هل البشر اللى
       بيحاسب البشر ولا الله هو المحاسب.
-    يعنى سيادتك بتطالب بدولة مدنية علشان تزيح عنى ومن غيرى الاندهاش والنفور وغير ذلك.
-        ممكن ولكن المجتع ساعتها لا ينظر لى أو غيرى ممن لهم أتجاهات
          معينة نظرة سيئة.
-        بس أؤكد لك أن المصريين بصفة خاصة لا يسمحون بقيام الدولة
      المدنية بهذا الشكل لأنها بعيدة كل البعد عن القيم والعادات والدين الاسلامى.
-        هههههههههه يبقى مصر ها تفضل متخلفة.
-        أنت شايف كده .
-        طبعا وأنا مع كل اللى بينادوا بالدولة المدنية.
-        شكرا على الوقت اللى قضيته معك.
-        العفو ده أنا اللى متشكر.
تركته وترجلت بعيدا عنه ولكننى لمحته يتحدث مع أحد الشباب ثم غادرا الميدان سويا.