إعلان

الآن بجميع مكتبات مصر والوطن العربي --------->>>>> (( أحدث إصدارات الكاتب عادل إدريس المسلمي..... " الزناتي حنيفة -العجب ألوان - مقرمشات ساخرة " عن دار الراية للنشر والتوزيع ))<<<<<------


السبت، 28 ديسمبر، 2013

بالبلدى الصريح

قرأت الدستور الجديد المزمع الاستفتاء علية أوائل الشهر القادم وتعجبت كثيرا ممن يحاول تشويهه.
فهذا الدستور لم يكتب مثله من قبل ولم يضاهيه دستور آخر منذ سطرت الدساتير وقد تجولت فى عدة دساتير لأرى ما يجعلنى أرفضه أو أرفض بعض مواده ولكننى وجدت أنه وبصراحة مطلقة كتب ليريح كل الأطياف بل كل ما يخطر على بال أحد كتب فيه فأصبح بحق دستور لكل المصريين.
يعنى وبالبلدى الصريح دستور طبطبة يعنى مظبط الجميع يعنى دستور شعبى .
لذا فمن يقول عنه أنه دستور به عوار فليسمح لى أن أقول له أنت لا تعى ما تقرأ.
ثم تعالوا نعود للماضى فمن كان منا يقرأ الدستور أو حتى يعلم معنى كلمة دستور ؟ فقد كان قلة من المثقفين هم فقط ممن يعرفون الدستور ولا يفقهونه بصورة عميقة وكان من يحمل الدستور بيده يراه الناس بالمحروسه إنسان معقد وقد حكى لى أحد أصدقائى القدامى كان قد أستعار كتاب الدستور من المكتبة العامة ليقرأه كحب أستطلاع وعندما رآه والده وكان رجل طيب رحمه الله قال له " أنت مشيت ورا الشيوعيين ولا إيه؟ الكتاب ده ما يفضلش فى البيت لحظه أحنا مش عايزين مشاكل مع الحكومه يقصد البوليس السرى أى أمن الدولة " وكان هناك من يحمله كعياقه وفشخرة كأنه يحمل راديو كاست وعامل له تلبيسه قطيفه ودى كانت موضة فقد كان البعض ممن يسافرون لليبيا يعودون بأهم شيئين بالطو ووتربروف وكاست حجم كبير ويمشى يتعايق به بالشارع ؛ أما الآن فيتحدث عن الدستور أم إسماعين بائعة الخضار والحاج براهيم العطار وحنفى البقال وزيكو العجلاتى حتى الحاجة فاطنة بائعة الجبنة والبيض.
لذا وعلى غير طبيعتى بعدم ذهابى الى صناديق الانتخابات منذ ترعرعت أعلنها بأننى وعلشان خاطر عيونك يا محروسه سوف أكون بالصفوف الأولى لأدلى بصوتى وأقول " نعم " حتى ولو كنت سأمكث طوال اليوم أمام المقر الانتخابى بغض النظر عن عدم انتمائى لا لدوولا ولا لدوكهوما كونى أنتمى وبكل فخر لقوم عباطة وأرفع شعارهم " لا لينا فى الطور ولا فى الطحين وأدينا عايشين" وطبعا ها يطلعلى حد يقولى تانى أنتم عايشين عبيد وخساره فيكم الثورة اللى عملناها علشان تشموا نفسكم وطبعا مش ها أرد عليه كونى جاهلا فى أمور منافع الثورات .
الحكاية مش حكاية دستور الحكاية أننا عايزين نمشى خطوه لقدام علشان الناس الطيبة الغلبانه اللى قعدة فى الكفور والنجوع وحاطه ايديها على خدها مستنيه الفرج الناس اللى عايزه تشوف مصالحها الناس اللى زهقت من كرنفال المليونيات والتظاهرات الناس اللى بدل ما تضحك أصبحت تبكى .
كنا زماااان نستمع صباحا لأحلى الأعانى " يا حلو صبح يا حلو طل" دلوقت بنسمع " يا حلو فخخ يا حلو طخ ".
اللهم أهدى شعبك يا محروسه هداية ما بعدها رجعة أنك يا رب سميع مجيب الدعوات يا أرحم الراحمين فأنت على كل شىء قدير.

العشق الحراق

عندما سرح قيس فى سحر عيون ليلى وهو يحمل وعاء الحطب المشتعل وأمسكت النار بكم قميصه وفطن المعلم أبو ليلى بالحدوته فزمجر ولبس القناع الخشبى وصاح قائلا لقيس " جئت تطلب نارا أم ترى جئت تشعل البيت نارا"  ثم لحقه " أمض أمض قيس أمض " ومضى قيس على صك الهجران .
وعندما صرخ نيرون قائلا " أنا ها أحرق روما " كان يترنح من الخمرالتى لحست دماغه فقد رأى أنه يجب إعادة رونقة محبوبته روما حيث راوده خياله أن يحرقها بأكملها وأن يعيد بنائها، وبدأت النيران من القاعدة الخشبية للسيرك الكبير حيث شبت فيها النيران وانتشرت بشدة لمدة أسبوع في أنحاء روما، وألتهمت النيران عشرة أحياء من جملة أنحاء المدينة الأربعة عشر، وبينما كانت النيران تتصاعد والأجساد تحترق وفى وسط صراخ الضحايا كان نيرون جالساً في برج مرتفع يتسلى بمنظر الحريق الذي خلب لبه وبيده آلة الطرب يغنى أشعار هوميروس التي يصف فيها حريق طروادة وهلك في هذا الحريق آلالاف من سكان روما.
وعلى نفس النهج كان عنيزة الحميرى ملك مملكة جحشوم فقد كان يرى أنه يجب أن يجدد كل سنة مملكته فيقوم بحرقها كاملة وعندما كان يعاتبه وزيره عن أفعاله هذه كان يصرخ فيه قائلا : " مملكتى وأنا حر فيها أحرقها وأبنيها " .
ومن هنا كانت الحكاية وأبتدى العشق الحراق ورأينا من تحرق نفسها أوتنتحر أو من يلق بنفسه غرقا أو شنقا أو من يقوم بقتل عشيقته وأهلها أو من سلبها منه .

ولكن هناك العشق الماجن الذى لا يهدأ ولا يهادن وهو عشق دمار الحبيب .
فقد عصف االعاشق الماجن بمحبوبته من جراء نار الغيرة فها هو
فى العراق بعدما رأى خديها من شدة بريقها عاندت القمر.
وفى سوريا بعدما رأى قدها المياس يزيد مياسا ودلالا.
وفى ليبيا بعدما لمح شعرها الغجرى المجدول يهفهف فوق الُربا.
وفى تونس بعدما ضربت بقلبها الأخضرانى العقول.
وفى اليمن بعدما غازلت بعيونها المها نجوم السماء.
وفى مصر بعدما سحرت بسمارها القمحاوى الالباب.
وهاهى لبنان يعصف بها الماجن بعدما رأى شجرات الأرز تتمايل برقة ودلال.
فلا غريب علينا عندما نرى من يجاهر بعشق الوطن وهو يغنى " وطنى حبيبى الوطن الأكبر نفسى أشوفه وهو بيصغر " .

الجمعة، 27 ديسمبر، 2013

كيف هذا يا هذا

مع كل أحترامى لمن هللوا بقرار أعتبار جماعة الاخوان جماعة أرهابية فأنا ضد هذا القرار ورغم أننى ضد الافعال التى يقومون بها وأخطاء لا حصر لها.
فكيف أعتبر جارى أو قريب لى أرهابى ؟.
فنحن شعب من الصعب علينا مهما حدث أن نتلحف بالعداوة مع من كان يقاسمنا حياتنا ومن غير المعقول أن نكرهه بين ليلة وضحاها ونطلق عليه أرهابى فلى أصدقاء أصلاء من الأخوان ولى أقارب ولى جيران أعتز بهم.
هذا القرار لن ينفذ وإن نفذ فسينفذ من كارهى مصر وسيخلق ما لا يحمد عقباه.

ولكن يجب على جماعة الأخوان أن تعى أن كل قطرة دم تراق تجعل هناك من يصمم على تسميتهم أرهابيون وينبشون فى الماضى عن كل هفوة كانت عليهم فلتكف الأذى فدم المسلم على المسلم حرام حرام .
ولا ننسى جميعا أن من يسوقنا نحو كل ما يحدث هو من يريد بنا الفرقة ولن يهدأ باله إلا ويرانا هياكل عظمية بالكاد تغنى بحبك يا مصر ونحسد الصومال على عيشتهم الهانئة.

أرجو أن يفهم كلامى بصورة واقعية حتمية وليس بما تكنه القلوب .
كل يحكم عقله ويبتعد عن الاعلام الفاسد الذى كان له الفضل فى كل ما يحدث بين أهل المحروسة وإن كنا نبغض قناة الجزيرة شر كره كونها أداة لمن يريد هلاكنا فلدينا أيضا إعلام يستحق النحر على باب زويله .
حفظ الله مصر وأهلها من شر البلاء.

ومن أراد لمصر سوء فأجعله يا رب العالمين لا يهنأ بما يخطط له أنك سميع وقادر على كل شىء.

الأربعاء، 25 ديسمبر، 2013

أستبولياية بطعم الحنضل


• لازالت قناة الجزيرة تجاهد و بشدة فى حب مصر لأسقاطها وتزعم أن الانفجار قد تم بواسطة أمن الدولة لأثبات أن جماعة الأخوان جماعة أرهابية وستمر سويعات وتذيع بيان أنصار بيت المقدس ليعلن مسؤليته عن التفجير الأرهابى ... صحيح أن من أسماك الخنزيرة كان له بعد نظر.

• قال أحد مناصرى الأخوان أن الانفجار ليس للأخوان دخل فيه والدليل أصابة أحد شباب الأخوان بخضة من جراء ما حدث وكان بأحد محال عصير القصب القريبة من مكان الانفجار يشرب فخفخينا.

• يريدون أشعال فتيل الحرب الأهلية بمصر بأعتبار أن من يملك السلاح هم جماعات الأخوان وستكون لهم النصرة على كفار مصر.

• عندما يستفحل الغباء فقل على الدنيا السلامة فهل ما يحدث الآن من أنفجارات تطيح بالأبرياء يزيد من شعبية الأخوان أم سيعصف بهم إلى المجهول ناهيك عن ما أقرأه فى بعض التويتات لأشخاص تهلل وتكبر الله أكبر والموت للفجار الكفرة.
• نحن شعب عاطفى طيب وما يحدث الآن من إرهاب بأشكالة المتنوعة سيحول جموع المتعاطفين من قبل مع الأخوان إلى الكارهين وبشدة فسيكولوجية الأنسان المصرى دائما تتجه إلى الهدوء وحب الوطن .

• حاولت كثيرا أن أعرف من هو المسلم الكافر من وجهة نظر المكفرين ولم أصل لحقيقة سوى أننا نتجرع مشروب السوبيا صيفا والحلبسة شتاءا.


• ما يحدث من إرهاب بمصر جعل البعض يتحسر على أيام مبارك والعادلى وهذه سقطة تحسب على الأخوان.

الأربعاء، 18 ديسمبر، 2013

مولد سيدى الدستورى - 2

كان من الصعب أن نتوصل إلى ( حوءه اللاسع ) هكذا أسمه وقد جاهد صديقى حتى أتمكن من لقاءه وكان موعدى معه بوقت متأخر كطلبه.
هو شاب فى مطلع الأربعينات نحيف الجسد قارب شعر رأسه على الزحف لمهب الريح أسمر البشرة غير متزوج يعيش بشقة متوسطة الحال بمنطقة شعبية وجدته بأنتظارى :
- مساء الخير.
- مساء الجمال على الناس السقعانة.
- ما أنت شايف الجو عامل إزاى.
- يبقى نديها سحلب بالمكسرات إيه رأيك ؟
- جميل أنا أعشق السحلب فعلا.
- فتح الشباك من خلفه ونادى :
- أتنين قهوة على الريحة وبسرعة يا سمعه وأوعى الوش يروح وحياة خالتك زوزو والحساب يجمع.
دخل صبى المقهى وهو يحمل كوبان من الحلبة الحصى التى بينى وبينها عداوة وأضطررت أن أشربها غصب عن نفسى.
سألته:
- سمعت أنك أستاذ شعارات ونداءات؟.
- الله يخليك ؛ هو فعلا أنا الوحيد اللى يمكن فى مصر كلها اللى بيألف الشعارات والنداءات والكل عارفنى ودى موهبة من عند ربنا وده أكل عيشى.
- يعنى أفهم من كده أن الشعارات اللى ماليه البلد دى طالعه من دماغك؟.
- مش كلها فى شعارات صينى يعنى بتتنسى بعد طلوعها على طول ؛ إنما شعارى تلاقية راشق فى النافوخ يعنى يتغنى وأنا أعرف شعارى وهو بيتقال من على بعد أميال وتلاقيه له طعم ولون ويضرب فى السليم .
- ومين زباينك اللى بتعملهم الشعارات؟.
- أنصار الأخوان والمعارضين ليهم وعندك كمان عمال المصانع والنقابات يعنى ما فيش مليونية ولا أحتجاج إلا لما تلاقى شعارى راشق ومصهلل.
- وإيه آخر أخبار شعاراتك؟
- كل سنة وانت طيب أحنا داخلين على الدستور ومطلوب منى حوالى عشرين تلاتين شعار.
- وبتاخد كام فى الشعار الواحد؟.
- حسب نوع الشعار والمناسبة والعدد يعنى لو شعار شديد اللهجة وها يسمع يبقى الحتة بميه وخمسين جنيه ولو شعار رازع فى الحكومة يبقى بـ متين جنيه أما بقى لو شعار عابر البحار لأى دولة يبقى فى أخد وعطا .
- طيب ممكن أسمع حاجة منهم؟.
- دى أسرار ولكن علشان خاطرك وواضح أنك سميع وعلشان خاطر مجيتك عندى فى عز البرد ها أسمعك كام حاجة بس توعدنى تسمع وتنسى أنا عاكش فلوسى على داير مليم ومش عايز حد يقولى ده شعار مستعمل قبل كده.
- أوعدك وسمعنى.
- دى حاجة لأنصار الأخوان ها تتقال قبل الأستفتاء:
" يا جهلا يا جهلاء ... أوعوا تروحوا الأستفتاء "
" على فين كده رايحين ... بكره عيالكم يسبوا الدين"
" أوعوا أوعوا تقولوا آه ... بكره تقولوا منه جــاه.
" بكره ها تزعل أوى من نفسك ... لما مراتك تكتم نفسك"
- ودى حاجة للمؤيدين للدستور ها تتقال فى نفس التوقيت وبترد على الأنصار:
" ياعم سيبك سيبك منهم ... كنا خدنا إيه منهم "
" كدابين كدابين ... مين قال ها نسب الدين"
" أوعوا أوعوا تقولوا لأ ... ده دستورنا ها يجيب الحق"
" مراتى مراتى وأنا حر فيها ... تكتم نفسى بحضن أرضيها "

- الله عليك يا حبيب والديك.
- الله يخليك دى حاجة كده ع الماشى وأهو كله بتمنه.
تركته وخرجت .....
بدأت بطنى تكركب من الحلبة التى تجرعتها على مضض وقلت لنفسى :
" قالى سحلب بالمكسرات ونادى على الواد صبى المقهى يجيب قهوة على الريحة جاب حلبة حصى أمال لو كان قالى تشرب كاكاو باللبن كنت ها أشرب إيه؟".
صحيح لاسع بحق


الاثنين، 16 ديسمبر، 2013

مولد سيدى الدستورى

وقفت بأشارة للمرور منتظرا أحمرارها لأعدى من خطوط المشاة فلاحظت تجمع البعض على مقربة منى على نفس الرصيف فتنحيت عن التعدية لأعرف ما يدور هناك فوجدت إحدى المذيعات تمسك بالمايك وكاميرا تصوير خلفها أحد الأشخاص وشخصان آخران يأتوا إليها بالمارة ليتحدثوا معها ؛ فى حقيقة الأمر هى ماشاء الله جميلة جدا وبالمعنى الشبابى مزة ولا كل المزز وقفت أرقب الموقف وليس لأرقبها ! ودارات الحوارات الآتية مع بعض ممن آتوا بهم إليها:
- إيه رأيك بمواد الدستور؟.
الراجل أتسطل من جمال المذيعة فصمت ولم يرد فقط كان ينظر إليها فكررت عليه السؤال:
- كنت عايز أعرف رأيك فى مواد الدستور؟.
- إيه ؟ آه حلو أوى وجميل والله عسل.

وجاء آخر من الشباب:
- إيه رأيك بمواد الدستور؟.
- جامد طحن وخلينا نخلص بقى أصل الابلتين لادع فى دهاليز الحياة .
- يعنى إيه مش فاهمة؟.
- يعنى خلى الاتامة تروح بالسلامه ونطأطأ العيشة.

وجاء آخر ملتحى :
- السلام عليكم.
- عليكم السلام ورحمة الله وبركاته؟.
- كنت عايزه أعرف يا مولانا رأيك فى مواد الدستور؟
- لم اقرأه ولن أقرأة ومن يقرأة أو حتى يخطر بباله فهو آثم ويقع عليه حد الحرابة.
- لماذا يا مولانا؟.
- لا جدال فى الفسق لا جداااااااال .

وجاء شخص تبدوا علي وجه الطيبة والمسكنة يرتدى جلباب وبيده سندوتش فول:
- كنت عايزه أعرف رأيك فى مواد الدستور؟.
- قصدك اللى ها نستفسى عليه بعد كام يوم ده؟.
- أيوه .
- سمعت والله أعلم أنه وأستغفرك يا رب ها يبيح سب الدين ولامؤاخذه يعنى ها يخلى النسوان تتنطط على الرجالة والدنيا ها تبقى سداح مداح .

وجاء شخص وأقتحم المكان وطلب الحديث ثم نظر إلى الكاميرا مبتسما:
- الدستور ده يعتبر من أحلى الدساتير فى العالم أنا قريت كل الدساتير وعملت مقارنة لكل كلمة وأنا من هنا بأقول لكل الناس روحوا وقولوا نعم.

فتدخل شخص آخر وبدت على وجهه علامات الغضب وخطف المايك :
- يعنى إيه تقول للناس روحوا قولوا نعم طب إيه رأيك بقى الدستور ده زى الزفت يكفى يكفى المادة 530 آهى دى لوحدها قنبلة تهد البلد يعنى إيه الواحد يصحى الصبح بدرى وينام متأخر خلاص يعنى الواحد ما يعرفش ياخد تعسيلة وسط النهار ؛ حرام ده ولا مش حرام بلا دستور بلا نيله وعموما أنا إذا كنت ها اقول نعم ده علشان خاطر عم حسين حبيبى اللى سامعنى وشايفنى دلوقت ... صباحوووووو نادى يا عم سحس وأحب أسمع أغنية يامه القمر ع الباب وأهديها لمراتى حبيبتى .

وجاءت فتاة وطلبت من المذيعة ألا تصور إلا بعد أن تعدل مكياجها :
- كنت عايزه أعرف رأيك فى مواد الدستور؟.
- بسراحة وكل سراحة مش علشان أنا مش بحب الأخوان الدستور ده فيرى فيرى نايس أبسلوتلى جود ريلى فانتساتك كفاية مادة حكوك المرأة والتفل أسبحوا ليهم كيان كان الأول يا حرام المرأة والطفل فى الدياع ؛ بسراحة وندر وندرفول ... باااااى.

وفجأة جاء صوت من الجانب الآخر من الرصيف زاعقا " بتوع قناة الجزيره أهم " وعينك ما تشوف إلا النور مصر كلها أتلمت عليهم وهات يا ضرب وتكسير للكاميرا ولقيت نفسى على الرصيف التانى إزاى ما أعرفش.

الثلاثاء، 10 ديسمبر، 2013

براءة الفول


كان الفول هو المتهم الدائم بقفص الأتهام بدعوى أنه مخرب العقول ويجعل الشخص يأت بتصرفات غير إرادية قد لا يسأل عنها كونه كان مخدر كليا.
وإذا كان الطلبة والطالبات مناصرى جماعة الأخوان المسلمين لايأكلون الفول وإنما يأكلون الشيش طاووق والبانية والبيف برجر والصوصيص والبومفريه أو الكرانشى والشيبسى ويتجرعون الكانز بأنواعه المختلفة.
فإذا يا سيادة المستشارين فإن الفول برىء براءة الذئب من دم أبن يعقوب ونطلب البراءة .
فلنبحث عن أسباب تخمر هذه العقول وجعلها لا تعى ما تفعله.
هناك شىء ما غامض بغض النظر عن الانتماء فقد يكون هناك مادة دست بهذه المأكولات والمشروبات شعننت العقول وإلا قول لى سبب يقنعنى لما يحدث من عنف وإياك أن تقول لى عودة الشرعية.
لا تتعجب من كلامى وبالهداوة فكر وعود بذاكرتك للوراء محطة أو محطتين أتوبيس بس خد بالك لتخبط بشجرة وتذكر كيف مات ياسر عرفات وغيره ممن يموتون ببطء بأمراض غريبة ليست مسماه و ليس لها ترياق.
فمن يستطيع أن يقتل يستطيع أيضا أن يخبل العقول ويحول مسارها الطبيعى وتستطيع أن ترى التصرفات اللامعقولة وأنت ترى ما يحدث، أنظر للفتيات وهن ثائرات ستعرف ما أقصدة وإياك أن تقنعنى أيضا أنهن ثائرات العصر الحديث.
لقد بات الناس يراجعون أنفسهم من التعاطف الحان إلى التعاطف الجاف من جراء ما يحدث من ضغط يومى أثر على الحياة اليومية مع محو يوم الجمعة من ذاكرة المصريين بعد أن أصبح يوما لتشييع الجثامين.
أنا كل خوفى أن تنفرط مسبحة الأخوان من جراء ما يحدث وهو فصيل سياسى هام كافح طيلة ثمانون عاما وأنكوى بنار السلطة بغض النظر عن أحلام عودة الخلافة العثمانية أو أحلام الفتى الطائر أوباما.

الأحد، 8 ديسمبر، 2013

سمك لبن تمر هندى

هل أتى الربيع العربى على الأخضر واليابس حقا؟
لقد أصابت الحوسة أهل المحروسة فتصحرت العقول.
جلست بأحد المقاهي لأستريح بعض الوقت فوجدت من يجلس بجانبي ممسكا بجريدة صباحية يقرأ ويضحك ثم يهز رأسه فأحببت أن أنكشه لأعرف ما به :
- من فضلك كم الساعة الآن؟ فنظر إلي بدهشة وقال: خمستاشر وربع وخمسة ولو عايز تظبط خليها وستة.

- من فضلك عاوز أروح شبرا أركب إيه ؟ فقال لى : وليه تتعب نفسك أستنى هنا وأنا ها أكلمهالك تيجي دى معرفة قديمة.

- واضح أن الجو غيم وشكلها كده ها تمطر فأبتسم وقال لى : آسف جدا أنا مش من هنا أسأل صبى المقهى.

وجدته أقترب بكرسيه ناحيتى وتكلم بصوت خافت :
- الأخ أخوانى ولا سلفى ولا سيساوى فقلت له : لا ده ولا ده ولا حتى ده فتعجب وقال : أمال إيه؟ فقلت له : أنا اللى الهوا رماه ! فمصمص شفتاه وقال لى: يا حول الله يعنى على كده أنت مش من هنا فقلت له : أيوه من هناك فقال لى : منور مصر والله تشرب إيه بقى؟ فقلت له شيح بابونى سكر خفيف فنادى على صبى المقهى بصوت عال وقال : هات هنا واحد زرنيخ بربونى سكر زيادة وما تنساش الشالموه.

الجمعة، 6 ديسمبر، 2013

عودة سى السيد


      كنت أظن بل أعتقد أن متغيرات المجتمع المتلاحقة  ستأتي بفكر مختلف للفتاة  من حيث الشاب المناسب التى تأباه الفتاة زوجا لها فقد يكون فتى أحلامها  شاب ثوري كالأخ دومة أو من يرتدى البنطال الساقط أو البنطال الفيزون أو من يرسم وشم التنين الأسود على كتفيه أو بمن يتعايق بتمائم عظام القرود بمعصميه وعنقه.
       وقد كان لى لقاء جاء بالمصادفة يجمع بين فتاتين وشابين متقاربا الأعمار والتعليم العالي وكان سؤالى لهم عن سبب تأخر سن الزواج الآن حتى وصلت الفتاة لمرحلة ما يطلق عليها العنوسة هل هو تعنت من الفتاة أم هى ظروف مادية واجتماعية؟.
      وقد فوجئت بإحداهن وهى تقول لى أنها تبحث عن رجل يشابه سى السيد ولكنه مستحدث وعصرى فضحكت لدرجة أننى طالبت منها أن تعيد الكلام لعلني لم أستمع جيدا فكررت ما قالته فتعجبت وقلت لها سى السيد أأنت متأكدة أم هو مزاح ؟. فأبتسمت وقالت أنا أقصد ما أقوله.
      ومن فرط أنبساطى منها كونها فتاة رقيقة وجميلة الملامح والقد  قلت لها: ولكن ما تعرفونه عن سى السيد أنه رجل متشدد الرأى لا يعترف بديمقراطية الحوار يعنى بالعربى صعب الدماغ  فأبتسمت وقالت : هذا ما أريده مع بعض التعديلات التى تتماشى مع الواقع.
       تعجبت أكثر بل صمت لحظات كى أستجمع كلماتى التى تاهت من فرط أندهاشى وقلت لها: وماهى هى هذه التعديلات ؟ ضحكت وقالت برقة : طربوش مش فى طبعا  ولا اليونيفورم اللى كان يلبسه زمان  فضحكت على طريقة كلامها فقلت لها: دى حاجات عفى عليها الزمن وقد تفهمت من كلامك أنت عايزه رجل شديد وله شخصية قوية فقالت : نعم هذا ما أريده  بالفعل.
فقلت لها: وأين تجديه الآن هذا السى السيد فضحكت وقالت لى أكيد سأجده حتى ولو لم أتزوج.
      وقد وجهت سؤالى للفتاة الأخرى فقلت لها: ما رأيك فيما قالته صاحبتك فقالت : أنا يكفينى فقط أن أجد شاب مناسب يستطيع أن يتزوج فلى أخت أكبر منى وقاربت الثلاثين ولم تتزوج بعد  وهى أجمل منى بكثير ورغم أنها خريجة كلية طب وتعمل طبيبة إلا أنها لم تتزوج بعد ولا حتى تقدم لها عريس مناسب فكلهم دون المستوى .
     وهنا جاء الدور لكى أسأل الشابين دفعة واحدة فقلت لهما: من وجهة نظركم ما رأيكم فيما قالته الآنسة عن ودها أن تجد سى السيد؟ فقال أحدهم: هى تريد أن تعود لعصر الجاهلية ولها ما تريد وقال الآخر مازحا : ما أنا أهوه جامد طحن وممكن أشخط وأنطر وأكون سى السيد .
     ضحكت وسألتهما ولكن ما هى مشكلتكم أنتم حتى تجدوا الفتاة المناسبة فقال أحدهم: أنا أملك شقة ومجهزة  وميسور الحال وأستطيع أن أتزوج فى أى وقت ولكن لم أجد حتى الآن الفتاة التى تدخل دماغى يعنى التى تتفاعل كيمائيا معى فلت له : وضحلى يعنى إيه تفاعل كيمائى فقال لى : يعنى تكون بنت روشة ومش خنيقة.. كول يعنى أما الشاب الآخر فقال لى : ماما قالت لى ما تستعجلش لغاية لما تشوفلى واحدة على مزاجها تريحنى .
     وبرغم أن الظروف المادية والاجتماعية لها عامل مؤثر حتما  فى تلك المشكلة إلا أننى الآن عرفت لماذا عادت الفتاة لتبحث عن سى السيد المعاصر وسط شباب يبحثون عن  الكول و الروشنة ولما ماما تجيب له عروسه على مزاجها وتريحه.

الأحد، 1 ديسمبر، 2013

من هون لهون يا قلبى لا تحزن

 سمعت هذا الحوار صباحا:
- ياض ما تخافش وسيبك من أبوك.
- لا يا عم أبويا يضلبنى على التيتى وما أقدرس أقعد على الأرض تانى.
- ياض ها تنبسط معانا وها تاخدلك خمس برايز كل يوم.
- يا عم لوووووووووح خد أنت البلايز .. قلتلك أبويا يلسعونى .
- يخرب بيت أبوك.. ياض يمكن تضرب معاك وتطلع فى التلفزيون.
- تلفسيون إيه هوأنا لايح العب ماتس كورة ولا سايفنى أبو تليكة يعنى .
- طيب تعالى بس أحنا كلنا رايحين زيكا وحنطوره والنص وحتى فرحات الجن جاى معانا.
- يا عم انا ما ليس فى المظاهلات بتاعتكم ديه وابويا لو علف ها يلسوعنى على التيتى.
- طيب ها أكلك لحمة راس وكوارع إيه رأيك بقى.
- ماسى يا عم النجم إذا كان كده آجى وعلقة تفوت ولا حد يموت.
            (ده كان الواد حنفى بانجو بيتكلم مع سعيد الأهبل )

و سمعت هذا الحوار مساء :

الجزيرة مباشر مصر
-------------
- كم من الضحايا يقعون ضحية بلطجة الشرطة أنظروا لهذا الشاب وهو يترنح قتيلا فقد طالته رصاصات الغدر وهو لاحول له ولا قوة فقط كان يردد يسقط يسقط حكم العسكر فتصيده القناصة وأوسعت جسده بوابل من طلقات الرصاص الحى أودت بحياته على الفور أنه الشهيد سعيد طالب بطب الأزهر ... أين حقوق الانسان؟ أين الضمير الغربى ؟أين هى السيدة أشتون ؟ أين الملاذ الأمريكى ؟ بل أين العدل الالهى ليقتص له من هؤلاء البلطجية ، إلى متى بل إلى أين بل إلى جهنم يا فراعنة مصر الجدد.
هيك تمام رغده ...  يسلملى ها التم اللى عم بينقط عصير العنبات الأحمر يلا اعطينى تأثر واضح بهل العيون الجميلة وشوية دموع على هالخدود التفاحى ... وأدخل كاميرا زوم على هالوجه المنيح يعطيك الف عافيه يا تيمورى.

السيبى سى مصر
-----------
- أنا أنا أنا بصراحة مش عارفه أتكلم دموعى وحشرجة صوتى منعانى من وصف ما حدث اليوم للشهيد سعيد .. واد غلبان لا له ى الطور ولا فى الطحين رايح يشترى كيلو بطاطس لامه ومعاه ورقة بعشرة جنيه يقوموا يسرقوا منه الفلوس ولما قاوم معاهم يضربوه ويقولوا له مين اللى أداك الفلوس علشان تحدف علينا طوب وفى الآخر يتهموه بأنه عميل بتشتغل مع الشرطة و يروحوا ضربينه على دماغة بحديدة يموت بالحال مش عافه أقول إيه ... ومعانا خال الشهيد سعيد.
- البقاء لله وربنا يصبر أهله .
- الله يخليكى يا ست لميس ها نعمل إيه قدره ونصيبه يموت كده ده كان أطيب عيل بالحارة .
- هل صحيح كان ينتمى لجماعة الأخوان المسلمين؟.
- يا ست الكل ده واد على باب الله يعنى أهبل مالوش فى السياسة والحكاية أننا لما كنا بالمشرحة جالى واحد رجل طيب ووطى عليا وأدانى ظرف فيه مبلغ من المال وقالى قول أنه من شباب الأخوان وأحنا ها نعوض أهله خير بأذن الله ، طبعا أنا رفضت آخد عوض وقلت له صحيح أحنا فقراء لكن ما بنقبلش عوض.
- بس أنا عرفت أن الظرف ده كان فيه 3500 جنيه صح ولا لأ .
- والله انا رجعت الظرف على طول وما شفتش فيه إيه؟.
طيب نطلع فاصل أبقوا معنا.
عدنا...............
- كنت بأسألك أن الظرف كان فيه كام تقريبا.
- كان فيه حوالى 3500 جنيه.
- وعرفت منين؟.
- جالى واحد تانى شكله كده أخوانى وقالى ها تاخد ال 3500 جنيه ولا لأ قلت له لا متشكرين عوضنا على الله.
- وعرفت منين أنه أخوانى ؟.
- من طريقة كلامه وقالى يا أخ .
- يعنى شوفوا عايزين يشتروا سكوت الضمير بمبلغ هايف 3500 جنيه علشان أهله يقولوا أنه من الأخوان مش حرام والله حرام ها تروحوا فين من ربنا .
أنزل بأغنية أى دمعة حزن لا لا .
خش بالكاميرا على ست الكل  لموس وأدينى زوم أوى على وشها .
أدينى يا ست الكل الزعل الاصلى بتاعك وأخلعى النضارة وأمسحى الدموع وفهمى النطع اللى قدامك ده يرفع اديه لفوق ويدعى ها نجيب الكاميرا عليه وناوليه منديل كلنكس يمسكه فى إيده لو مش عارف يعيط ينف وخلاص علشان يقوم ويهوينا وناوليه الظرف.


                                            سالخير عليكم

الأربعاء، 27 نوفمبر، 2013

أنا ضد قانون التظاهر

قرأت قانون التظاهر بتمعن ولم يعجبنى أطلاقا وأرفضه كلى وجزئى وأعلنها صراحة بأنه عوار فى حق من أصدره.
يعنى إيه واحد ولا حتى شوية شايلين صندوق مولوتوف ساقع ونازلين يحتفلوا برأس السنة بتاعتهم وفرحانين نقوم نعكنن عليهم الفرحة و نرش عليهم بخراطيم المياه وبعدين قنايل مسيله للدموع ده كلام برضه.

ولا شوية مقاطيع وبلطجية شايلين بنادق وطبنجات وبيحتفلوا بصديق لهم ليلة دخلته وعاملين له أحتفال بسيط وعلى القد نقوم نطفشهم ونطبق عليهم القانون ده كلام برضه.

ولا كام صايع من بتوع حركات وشقلبظات فى الهوا نازلين يشموا شوية هوا فى الشارع ويغنوا سوا فيها إيه يعنى لما يعطلوا المرور ولا حتى يتنيلوا يقفلوا الشارع مش حرام نرشهم يالميه ولا نعميهم بالغاز المسيل للدموع هما جايين يفرحوا ولا يعيطوا ده كلام برضه.

يعنى إيه كام شمام شايلين سنج ومطاوى ونازلين يلعبوا رياضة المبارزة بالشارع نقوم نزعلهم ونقول لهم بلاش لعب عيال ونعمل فيهم كده برضه.
لا لا أنا بصراحة وبأعلنها من هنا وعلى أثير موجة أف أخص ضد قانون التظاهر هذا .

أمال بس عايزينا نتطور الى الديمقراطية ونعيش الحرية ، يا أخونا مصر بتتغير على نار هادية واللى بيحصل ده طبيعى جدا وسو سو إيزى أمال كنتم عايزين ربيع عربى إزاى ما كنا بقى خلناه قاعد فى مكانه ولا جاش عندنا والراجل ما كنش ها يزعل ولا حاجة .

فينك يا عم هولاكو وفين قانونك الحنين .. كان عامل حتة فرمان للتظاهر يدرس أى والله يدرس للحكام.

كان عبارة عن فرمنتين فقط لاغير.
شوف وأتمعنن وأقرأ وسمع غيرك وأتسلطن وسلطن غيرك.

من هولاكو الى عموم الشعوب التى نحكمها
فرمان هولاكيكو بشأن التظاهر السلمى

بخلاف ما جاء بقانون التظاهر الغير سلمى ....................
فرمانه (1)  اللى شايف نفسه متظاهر وعايز يتظاهر ينزل بكل حب وها نشيله على كفوف الراحة لحد المقابر ومالوش خمسان ولا أربعين ولا حتى طلعة رجب.
فرمانه (2) اللى معترض على القانون يعتبرفى حكم المتظاهر وتطبق عليه المادة (1).



مع تحياتى هولاكو

الثلاثاء، 26 نوفمبر، 2013

أحنا اللى جبناه لأنفسنا

الحكاية أصبحت سداح مداح واللى نفسه بفتوى يفتيها .. هى دقن وسبحه وشبشب وجلباب قصير وقول يا عم الشيخ وسمعنا أحلى فتاوى هو الكلام عليه جمارك.

وأصبحت الفتاوى زى أزأزة اللب تفتح النت وتخش على تويتر تلاقى حنفية أتفتحت على كل نوع يا فتاوى وحسب الطلب.

ولهذا تلقفنا الغير وأصبح يطبخ الفتاوى ويسخر من الإسلام وللأسف الشديد نحن كمسلمين نقع فى الفخ كوننا الآن منقسمين ما بين معارض ومؤيد وكل يدلو بدلوه مستخدما ما يقع بيده من سخرية وهذا ما حدث بالفعل فقد وقعت تحت بداى فتوى مضحكة ومن الوهلة الأولى تعرف انها مفبركة ولم بفتى بها فتاى ولكن ما دامت الفتاوى على كل لون يا باذنجان فقد يصدقها البعض لسابق تشابهها مع فتاوى أخرى تراقص لها البعض وهتف وقال :
" بص شوف عم الشيخ بيقول إيه "
وتقول الفتوى وهى لشخص قد يكون وهمى أسمه أبو الإيمان:
أنقلها لكم من موقع تويتر :

" لا يجوز للمرأة المسلمة أن تأكل اللازنيا لأنها قريبة من كلمة زانية فقد تصبح كذلك وتسهر كل ليلة بحضن رجل آخر وتدمن المخدرات والعياذ بالله ".
بالتأكيد هى فتوى مفخخة الغرض منها السخرية ولكن بقى السؤال:
هما ولا أحنا اللى جبناه لأنفسنا؟.
ومش بعيد نجد أحدهم يفبرك فتوى ليقول :
"لا يجوز لرجل مسلم أن يشترى سرير من الخشب البلوط حتى لا يصبح من قوم لوط"

عليه العوض ومنه العوض ورحماك يا اااااااااااااااااااااااااااااارب

السبت، 23 نوفمبر، 2013

اللورد كور أمبو بتاح

نداء أرسله لى أحد الأصدقاء يقول:
من أبو إياد وجماعته
أستمروا بالكفاح وأن نصر الله لقريب ، نبارك لأنفسنا تفجيرات اليوم وعلى الله توكلنا لنحرر أرضنا من الأنجاس .
قرأت ذلك وقلت لنفسى لقد حان وقت الرحيل وسأحزم أمتعتي متجها لهيئة غوث وعون اللاجئين فقد تأوينى مبكرا بإحدى المخيمات على حدود تركيا أو ترمينى لاحدى البلدان الأوربية أهو منها لجوء ومنها أمتع نفسى بالشقراوات.
سرحت لحظات أسترجع فيها كفاح المصريين إبان الاحتلال البريطانى لمصر والعدوان الثلاثى وربطت ما يحدث الآن من تفجيرات لمبانى الجيش وقتل الجنود والضباط وما كان يحدث من تفجيرات بواسطة الفدائيين بكمبات الانجليز بالعباسية والإسماعيلية وهى نفس النداءات التى كانت ترسل للفدائيين بعد كل عملية فدائية.
لقد أعتبر هؤلاء أن الجيش المصرى والشرطة هما الاحتلال والمؤيدين هم الحلفاء وأن ما يفعلوه هو الكفاح ضد الاستعمار وأعوانه من الحلفاء .
ولكى تكتمل الصورة ونفس المشهد وبدلا من ان يخرج الطلبة من جامعة فؤاد والطالبات من مدرسة السنية يخرج الطلبة والطالبات من جامعة الأزهر يهتفون يسقط يسقط حكم العسكر ويا عبيد يا عبيد أحنا أسيادة وأنتوا بيادة بدلا من الاستقلال التام أو الموت الزؤام ويا عزيز يا عزيز كبه تاخد الانجليز وطبعا مش ها نسمع عاش الهلال مع الصليب ولكن يا ترى هل ستصدح أغنية بلادى بلادى لك حبى وفؤادى وسيرفع علم مصر عاليا خفاقا وسيشفى حسين رياض من الشلل ويغنى مع شكرى سرحان وصلاح ذو الفقار أم سيصدح نشيد أمان يا للى أمان والله ورجعت أيام زمان وبالتأكيد سيرفع العلم الجديد بعدما حرق علم مصر.
الناس دى عايشه دور الكفاح والفدأنة ومعتبرين أنهم هم أولاد الأرض وتم أستعمارها من الفراعنة إبان حرب أبيس بقيادة كوع عنخ كمون وآن الأوان لرفع الحماية الفرعونية وطرد اللورد كور أمبو بتاح المعتمد الفرعونى.
الحكاية دى هرشالى نافوخى أوى فى حاجة مش فاهمها مش يمكن فعلا اللى بيحصل ده صح الصح وأنا الزهايمر ضربنى بدرى؟.


اللهم أزح عنا الغمة وأهدنا الرشاد يا رحمن يا رحيم

الخميس، 14 نوفمبر، 2013

مستر هنفى ديمقراسى


يالها من مفاجأة فأثناء خروجى من إحدى الندوات المقامة بأحد فنادق القاهرة تشبهت عليه جالسا بأحد اركان اللوبى وقد تشككت فى بادىء الأمر أن يكون هو لهيئتة فقد كان يلبس بدلة من النوع الفاخر تقدمت منه وسألته:
-       مش حضرتك برضه الأخ حنفى ليبرتى؟.
-       اها وسهلا أنا هنفى ديمقراسى .. مين بقى حضرتك ؟ أكيد من المتابعين ليا سمان.
-       تقدر تقول كده وكنت تعرفت عليك بالغرزه أياها اللى بالقرب من ميدان التحرير.
-       يوووه أنت لسه فاكر دى كانت كى جى ون كفاح.
-       وده من إيه .. يعنى التغيير ده جه إزاى.
-       تطور وبرضه الواحد لازم يمسى مع الجديد رغم التعب ومن جد وجد.
-       والتطور ده جه إزاى؟
-   دى حدوته طويله بدأت لما سافونى على الكنوات الفدائية مصهلل وبأقول أحلى قول وهوبا ما فيس يومين لاقيت واحد محترم زى سعادتك كده جالى على الغرزة وخدنى معاه وقعدنا قعدة خد وهات وهوبا لقيتنى راكب التيارة وهوبا أحنا فين يا جماعة قالولى فى أوكلانيا البلد وقعدت كام اسبوع واكل سارب متفسح قابض بالاخضرانى.
-       ما شاء الله يعنى كانت فسحة لوجه الله؟
-       يا عم الباسا أفهم بقى أحنا كنا بندرس أصول الديمقراسي وأساى نخليها تنعنس البلد.
-       أها يعنى زى الناس بتوع 6 ابريل والتانيين يعنى.
-   قسدك مهوره ودومة وسوية البنات السقع .. دول كلهم حبايبى وأسحابى بس دول ليهم خط وأنا والجماعة اللى كانوا معايا لينا خط تانى هما بيشتغلوا تهييج إنما احنا بتوع الفرقعة.
-       يعنى انتم تبع الاخوان ولا تبع مين بالظبط؟
-   سوف سعادتك أحنا حسب خارطة الطريق الديمقراسية ممكن الصبح نكون بنسخن مع الاخوان وعلى المسا نكون سغالين ضدهم يعنى تقدر تقول كده تسليك وكده توليع.
-       طيب إيه الاستفادة من كل ده؟
-   يا هندزه زى ما قلت لك أحنا مهمتنا تعديل وضع البلد علسان تكون بلد ديمقراسي يعنى لو الحته دى عايزة تتسند بطوبه نسدنها ولو الحته اللى هناك دى عايزة ساكوس وكام مسمار نديها فهمت.
-       الله يكون فى عونك يا مستر هنفى.
-       سانك يو ويرى ماتس.
-       الله الله ده أنت اتعلمت لغات.
-       ما هو لازم كام كلمة انجليسى على حتتين فرنساوى على المانى علسان يمسى الحال.
-       صح الصح والله ده أنت بطل وها تكون ليك بصمة فى تعديل مصر يا مستر هنفى.
-       ميرسى باكو ... بس أنت أدعى لينا ما حدس يبصلنا فى اللى أحنا فيه ويبحلقوا فينا لا ها تبقى فى ديمقراسى ولا نيله وتفضل مصر زى ما هى متأخره سنين ولا ها نلحق حتى السومال.
-        بأدعيلك من كل قلبى يا هنفى بس أنت متأكد من اللى أنت بتعمله ده ديمقراسيه.
-   يا عم وحد الله  وقول يا رب  أمال بنعمل إيه عجين الفلاحة؟ أنت مس عايس معانا فى البلد ولا إيه ما بتسوفس مولد سيدى فرقعة  كل جمعة بلاس دى ما بتسمعس عن مظاهرات الجامعات ولا إيه؟.
-       بسوف وبأسمع.
-       أهو ده بقى السغل بتاعنا.
-       تسدق أنا كنت فاهم غلط.
-   معلس كلنا كنا كده وسويه سويه فهمنا وربنا وقعك فى طريقى  علسان تعرف الأصة وخدت كرسى فى الديمقراسى عمرك ما كنت ها تعرفها  إلا منى صح يا هندزه.
-       صح يا مستر هنفى .. انا متشكر على اللقاء الجميل ده.
-       داكن شاى.
-       لا شكرا ما بشربوش.
-       هههههههههههه دى بالالمانى يعنى شكرا.
-       يااااااااااه معلش يا مستر هنفى العتب على الفهم .. أشكرك واتركك فى رعاية الله.
-       ما يصحس تمسى قبل ما تاخدلك كاس معايا.
-       الف شكر ما ليش فيه ... هو انت سبت البانجو؟.
-       ما خلاس بقينا بنعفر أجنبى وبنديها ميه صفرا.
-       أسيبك بقى لمشاغلك وأشوفك على خير .
-   الكارت بتاعى أهه فيه ارقام الموبايلات بتاعتى والايملايت وسفحتى على الفايس بوك أدخل وسوف وأتفرج وأدعيلى وقول الله يخليك.