علي فين رايح يا جميل

تجيلي من هنا .. أجيلك من هناك

تبحلقلي .. أبرقلك

ترقصنى .. أطبلك

تلف من ورايا .. تلاقينى قدامك

ها تروح مني فين يا جمبل وراك وراك .

دى ليست أمثلة شعبية أوخربشات كلام

ده اللي بيحصل حاليا للإجهاز علينا لتفعيل المخطط المرسوم للخلاص علي الجنس العربي بكل طوائفة مسلم كان أو مسيحي أوحتى ملحد وللأسف لازال البعض يعيش حالة اللاوعي رافعا شعار " طالما الضرب بعيد عن مؤخرتي فليكن ما يكون ".

المسطح العربي أصبح عل صفيح ساخن بيستوي على نار هادية وجاهز للأكل.

ونحن لازلنا منقسمين متسلطنين نتجرع منقوع البراطيش ونغني ." أوعي تكلمني بابا جاي ورايا"

الوطن العربي عاوز دكر.. عاوز دكر.

من هو الواد الجن؟

أحيانا تظل فترة محتار لتجمل الكلام ليخرج راقيا بلا اسفاف أو تجريح أو بالبلدي كده " قلة أدب" .

فعندما تلاحظ أو تقرأ طول اليوم عن الهبل الغريب الذي طرأ علي فكر البعض فجعلهم يتبارون فيما بينهم علي .. من الأقوي من الأشيك من الأروع من الأجمل من بطل الابطال من أبو دم خفيف من الأطول من الأقصر من الواد الجن هل هو الحاج أردوغان أم القيصر بوتين؟.

منشورات وتشييرات وخد وهات وأمتلأت الصفحات بالصور وهذه صورة لاردوغان وهو بسن الخامسة ممسكا بمسبحة وتظهر عليه علامات الخلافة الاسلامية وهذه صورة للقيصر بوتين وهو بسن الرابعة وهو رافعا اصبعيه بعلامة النصر.

البعض يغيظ البعض الآخر والبعض الآخر يكيل للبعض الأول وأصبح البعضين بقدرة قادر أتراك وروس ونحن نقرأ ونتفرج علي الهبل.

بالذمة مش دي حاجه تفقع المرارة وتجيب مرض السكسكة.

تحب نضربك بأيه؟

من الواضح أن أمريكا وحلفائها يشنون حربهم علي داعش بقنابل سلميه يعنى تفرقع وتزغزغ في نفس الوقت .
هى نوع من القنايل التي تستخدم ضد الأصدقاء فقط و تسمى قنابل البوب كورن " popcorn " أي الفشار.
و قريبا سنجد صواريخ البابا غنوج وقنابل الكبيبة .