أزأز ع الماشي

في ناس تصحي الصبح كده ؟
وفي ناس بتصحي كده؟
تقولي إزاي أقولك إزاي...
الناس اللي كده الأولانيه بتصحي مبتسمة وتصبح عليك بكلمتين حلوين مع وردة تخليك طول اليوم مزقطط وتشيل عنك الهم .
أما الناس اللى كده التانية دول بقي طول الليل عقلهم الباطن شغال هري زي الخلاط اللي بيطحن الجوافة الناشفة .. يصحوا الصبح وجوههم عليها غضب الله وقبل ما يغسلوا وشهم يصبحوا عليك بمقطوعة من سيمفونية " الرقص علي الخوابير" لشخرهوف أو بقطفة من فطوف العلامة عنيزة الجحشي أو صورة لرأس شيطان وتحتها عبارة " بحبك با اسمك إيه" أو يفقعوك صورة لما يسمي بالكومنت الفشخ.
بالذمة في حد يحط صورة بمسمى الكومنت الفشخ.
و كلمة الفشخ يا سادة يا كرام قاطني الفيس وما يجاوره من تويتر وانستجرام وراكبي القطار والترام تصريفها هو " فشَّخَ ، يفشِّخ ، تفشيخًا ، فهو مُفشِّخ ، والمفعول مُفشَّخ .
وفشَّخ الشخص رِجْليه أي أرخى مفاصلَه .. واعقلها بقي أنت وترجمها حسبما يترأي لك ووفقا لهواك .. لو هواك قبلي يبقي الهوا هواك ولو بحري يبقي الهوا هوانا.
يخرب بيت كده .. أنا اللي خايف منه يطلعنا واحد بعد كده بالكومنت " الضم".
صباحكم خيرات وسعادة .. صباح الحب .. صباح الجمال.. صباح كل حاجة حلوة
تحياتي

الحب نعمة وليس نقمة

الحب منظومة متكاملة ...
يعني ما تنفعش تقسم قلبك أجزاء منها ما تحب ومنها ما تكره.
يعني ما ينفعش مثلا تكره زوجتك / زوجك وتحب أولادك أو العكس .
وما ينفعش تحب ابوك وامك وتكره أخواتك
أو تحب أمك وتكره أبوك أو العكس.
وما ينفعش تحب وطن تاني وتكره وطنك.
لتحب صح أو تأخذ جانبا وتقعد علي جنب وتشب شيح بابوني وتمزمز يالشاليموه وتريح دماغك واللى حواليك وتكتب علي قلبك " مغلق" لأنك ستكون شاذ بين الناس وشكلك مش حلو.

صباحكم حب بجد مش حب بلا طعم.
تحياتي

أشحن قلبك

لما تشعر بأنك مش مستطعم الحياة وأصبح كل شىء حواليك ليس له لون ولا طعم .

يبفي.. عفوا لقد نفذ رصيدكم .
أشحن قلبك بالحب ها تشعر بجمال الحياة.
أشحن وأدعيلي .
تحياتي

من وريقاتي ( غواص في بحر الهوي)

قرمش وفرفش

عندما تتأجج نار العشق .. تتراقص عقول الرجال
وعندما تتراقص العقول فهناك من يري امرأته ذات طعم ما أروعه فهذا يراها بطعم الكريز وذاك بطعم الباباز أو بطعم الفراولة أو بطعم المانجو أو بطعم الموز وهناك من يراها بطعم الشيكولاه أو كتورتة الآيس كريم أو كطبق حلويات شامية .

كل سيحتار في طعم لها .
ولكن هناك من ليس لديه حاسة التذوق لانسداد أنابيب توصيل الإحساس للقلب من تراكم شحوم الكره والحقد.
سارع لأقرب سباك لتسليك أنابيب الإحساس وادعيلي.
تحياتي
من وريقاتي ( غواص في بحر الهوي)

خذ حذرك منهن

إذا ابتسمت لك امرأتك بخبث .

فأبشر يا صاح فقد تأكدت أنك تبحر خارج نطاقها و أنك على مشارف الهاوية وما أدراك ما هي .. فقد تكون سكينة حامية أو ضربة قاضية .

وإن كانت حانية عليك فلك منها أجمل باي باي وخد الباب وراك.

فلتظل مستيقظا حتى تجد طريقا للفرار.

تحياتي

من وريقاتي ( غواص في بحر الهوي)