إعلان

الآن بجميع مكتبات مصر والوطن العربي --------->>>>> (( أحدث إصدارات الكاتب عادل إدريس المسلمي..... " الزناتي حنيفة -العجب ألوان - مقرمشات ساخرة " عن دار الراية للنشر والتوزيع ))<<<<<------


الثلاثاء، 21 يونيو، 2016

طلع اللي في دماغك

أحد الاصدقاء سألني...
أزاي الواحد يطلع اللي في دماغه؟.
شوف يا صاح ...
علشان تطلع اللي في دماغك .. تجيب دماغك قدامك .. تقولي أزاي أقول لك أزاي؟.
تخبط علي دماغك ها تقولك مين ؟ .. تقول لها أسمك الخماسي .. ها تقولك قولي كلمة السر؟ تقول لها تاريخ ميلادك .. ها تقول لك الحلو منين؟ .. تقولها أسم القرية أو النجع والمركز والمحافظة .. ها تقولك لو أهلاوي قول (1) ولو زملكاوي قول (2) ولو مش بتشجع كورة قول(3).
وتنتظر شوية ...
لو إجاباتك خطأ ها تقولك ...
عفوا .. أنت مش أنت فقد تكون شخص آخر وروح العب بعيد.
ولو إجاباتك صحيحة...
ها تلاقي دماغك طلعت من رقبتك وتنططت علي الأرض وتكومت في حجرك .
تمسي عليها : مسا الفل عليك يا جميل .
ها تمسي عليك : أحلي مسا علي الحلوين.
وتقعد معاها قعدة صفاء ولو مش عاجبك صفاء خليها هناء أو خليها ولاء انشالله هيفاء وتعزمها علي كوباية شاي بالنعناع أو فنجان قهوة ولو دماغك متفرنجة أديها كابتشينو ولو غاوية حاجة ساقعة ناولها ولو جعانة روقها وحسب ما تطلب حتى ولو طلبت كوارع لا تبخل عليها .
و تسألها ...
يا حلو قولي علي طبعك وأنا أمشى عليه.
لو قالت لك طبعي حامي.. شغل لها حتة أوكا و أورتيجا .
لو قالت لك طبعي حنين يبقي عليك وعلي السيموفينة العاشرة لشخرهوف.
ومع كلمتين حلوين منك ها تلاقيها فضفضت وطلعت اللي جواها .. هي تقول وأنت تكتب .. ها تلاقي نفسك شغاااااااال توماتيكي .
و كل ما دماغك تهنج ناولها كيس شيبسي.. صباع موز .. شيكولاتاية .. شوية حرنكش .. شوية لب .. كوز درة مشوى .
وكده ها تعرف تطلع اللى في دماغك.
وادعيلي .