فينك يا شيخة مراهم

                    زمان … زمان قوى  وليت الزمان يعود يوما أو حتى ساعتين، كانت الشيخة مراهم مؤسسة علاجية شاملة يتوافد عليها البشر من كل أنحاء المحروسة للبحث عن العلاج ، كانت الشيخة مراهم عندها الحل يعنى اللى عنده صداع شديد يعدى عليها تدعك له دماغه بليمونة وتقفلها له بالمفتاح واللى بيشتكى من أنه حاسس بجوز كلاب بيتنططوا فى دماغة ومش عارف ينام تعمله "حجاب العافية" يحطه تحت الطاقية واللى جوزها تاعبها وطول الليل سهران بره البيت تديها "تحبيشة عودة الحبيب" تحط منها لجوزها فى طبق الملوخية  واللى خايفه أن جوزها يطلقها علشان بتخلف بنات تديها إزازة ماء "العشق المجنون" واللى عايزه تتجوز تديها "قرون شطة الحبيب التايه" ترميها فى الحارة واللى جوزها منكد عليها عيشتها تديها " خلطة أبعد يا شيطان" تستحمى بيها ، وللشيخة مراهم يوم محدد من كل أسبوع يعرفه أهل المحروسة وهو يوم دق الزار ويكون بالحجز بميعاد سابق واللى راكبها عفريت عليها الحضور مبكرا ومعها الطلبات التى تحددها الشيخة مراهم وكل حسب نوع العفريت بعد الكشف المبدئى قبل أسبوع من حفلة دق الزار فالعفريت المعفرت طلباته تختلف عن العفريت المزفت غير العفريت الهندى ولا التركى أو الحبشى ويعتبر العفريت الصعيدى هو أكثر العفاريت طلبات لأن دماغه ناشفة وبيطلع بالعافية وقد يحتاج لأكثر من جلسة دق زار ويا ويل من تقول لها الشيخة مراهم أن عليها عفريت صعيدى يبقى ها تبيع اللى وراها وقدامها وغالبا العفريت الصعيدى بيكون راكب الستات الأغنياء.

             فينك يا شيخة مراهم وفين أيامك كنتى خلصتينا من اللهو الخفى اللى عمال يطلع ويختفى يروح ويجى  ، ينزل ويطلع ، تلاقيه  فى الصعيد وفى لمح البصرتلاقيه فى بورسعيد ، عمال يتمشى على كيفه ، الرويات كثيرة ،اللى يقول أنه شافه  كان ماشى فى ميدان التحرير لابس أحمر فى أحمروماسك علم فى إيده اليمين وبندانه فى إيده الشمال وراسم وشم  غريب على كتفه اليمين واللى يحلف بالطلاق تلاته أنه كان قاعد على قهوة فى ميدان سفنكس وبيدخن الشيشة ورمى عليه التماسى وقعد بجانبه وسمعه بيتكلم فى الموبايل وبيقول أنه اللهو الخفى وفى لمح البصر أختفى وروى شاهد عيان أنه أثناء سيره ليلا فى أحد الشوارع متجها لمنزله قام بتوقيفه أحد الملثمين شاهرا مطواة قرن غزال وطلب منه أن يعطيه كل اللى معاه  وكذلك الموبايل فأخرج كل ما يملك من نقود وعندما ناوله الموبايل سأله عن ماركته فقال له صينى بخطين فأعاده له وقال له لا مش لازمنى أنا بأفتكر بتلات خطوط  فلما سأله أنت مين قال له هات ودنك أنا اللهو الخفى وأوعى تقول لحد ، إلا أن رواية المعلم عطوة صاحب مقلة لب وسودانى التى حكاها على قناة الدربوكة قد تكون أقرب للصواب فقد قال أنه فى حوالى الساعة الثالثة بعد منتصف الليل وقفت سيارة فيات 128 حمراء فانوسها  اليمين مكسور والشكمان واقع ومربوط بسلك وخرج منها شخصين واحد طويل وأبيض لابس بنطلون جنز ووشيرز " بلوفر" أزرق ولابس نظارة سوداء والتانى قصير وأسمر ولابس ترنج أصفر وكاب ولابس برضة نظارة سوداء وطلبوا منه ربع لب أبيض وتمن أسمر ونص سودانى أسوانى فناولهم المطلوب ولم يعطوه الفلوس فلما طالبهم أشهرأحدهم المسدس فى وجهه  وقال له عجبك ولا مش عاجبك فقال له عاجبنى قوى فسأله أنتم ولامؤاخذه تبقوا مين فقال له أنا اللهو الخفى واللى معايا ده يبقى الطرف التانى عايز حاجة ؟ فقال له لا أنتم اللى عايزين أى حاجة تانية فقال له هات شوية حمص.

          لو الشيخة مراهم كانت موجودة مش كنا طلعنا بمليونية ورحنا ليها  تعملنا دقة زار نطلع اللهو الخفى اللى راكبنا ومهبب عيشتنا ومخلينا تايهين لا عارفين رايحين على فين ولا عارفين بكره ها يطلع لينا اللهو الخفى منين.

                                      حدش يعرف حد بيدق الزار ينوبه ثواب

28 تعليق على “فينك يا شيخة مراهم”

1. سوسنة قال: فبراير 3rd, 2012 at 4:02 م
   السلام عليكم ورحمة الله وبركاته اخي الكريم عادل إدريس اسعدك الله واقر عيونك وقلبك بالآيمان وكل سنة وأنت طيب واشكرك على تواصلك ومرورك الكريم بين اروقتي ونثر عطرك بين حروفي وترك بصمتك التي لا تمحى مع الزمن .. مواضيعك دوما شيقة وفيها العبرة والفائدة لك خالص أحترامي وتقديري أرشد صلي الله عليه وسلم إلي ما يقوي بنيان ودعائم هذه الأمة ففي حديثه الشريف يضرب هذا المثل الواعي‏:‏ مثل المؤمنين في توادهم وتعاطفهم وتراحمهم كمثل الجسد الواحد اذا اشتكي منه عضو تداعي له سائر الجسد بالحمي والسهر‏.‏ تحياتي لك سوسنة بنت المهجر انين الأرض
2. حاتم سباق قال: فبراير 3rd, 2012 at 5:55 م
   أشكر مرورك الكريم على مدونتي المتواضعة، وبصفتي صعيدي ومن سوهاج،أعرفك يأخي بأنه أكثر من عفريت صعيدي جاسم على جسد مصر الآن وعلى رأسهم “عمر سليمان” الذي يدير البلاد والعباد حالياً، وثانيهم “مصطفى بكري” ثم “سامح عاشور” وووو!
3. المسحراتي قال: فبراير 3rd, 2012 at 6:37 م
   كل عام وسيادتكم بالف خير والامه الاسلاميه وادعو الله ان ينعم علينا بنعمة الهدوء الاستقرار والسلام النفسي ****** اتمنى احياء السنه النبويه واتباعها تقرباً للمولى عز وجل كل االتحايا المسحراتي
4. الجميله نوراي الجميله قال: فبراير 3rd, 2012 at 9:31 م
   أستاذي الفاضل عادل ادريس كل عام وحضرتك وجميع الاسرة الكريمة بخير وسعادة جعل الله كل ايامكم سعادة وهناء كل عام وحضرتك بخير وصحة وستر لك تحياتي واحترامي
5. "آمنة حسين" قال: فبراير 3rd, 2012 at 10:14 م
   اخي الفاضل عادل ادريس كل عام وانت بخير و تحية شكر وتقدير لمرورك الجميل على عالمي الخاص”رسائل حائرة ” اما بالنسبة لموضوعك فقد كان راقيا ساخرا ناقدا للوضع في ام الدنيا مصر و في باقي الدول العربية نتمنى من الله العزيز القدير ان ينشر الأمن و الامان في بلاد المسلمين ,,,و يبعد عنا و عنكم الفتن سعدت بتواجدي هنا تحياتي
6. زياد صافي قال: فبراير 4th, 2012 at 5:08 ص
   اخي الحبيب استاذنا عادل ادريس السلام عليكم ورحمة الله وبركاته ثلاث كلمات تلخص معنى الحياه . . . . . تألمــــــــت !……فتعلمــــــــــت!……فتغيـــــــرت.
7. adel edris قال: فبراير 4th, 2012 at 9:17 ص
   إلى الأخت سوستة: أشكرك أختنا الكريمة على تعليقك وكلماتك النورانية لرسول الله صلى الله عليه وسلم لعل البشر يتعظ.
8. adel edris قال: فبراير 4th, 2012 at 9:19 ص
   إلى الأخت الكريمة : الجميله نوراي الجميله أشكرك لمرورك الكريم على المدونة وكل عام وأنتم بخير وصحة وعافية
9. adel edris قال: فبراير 4th, 2012 at 9:25 ص
   إلى الأخ الكريم : حاتم سباق أشكركم على زيارتنا بمدونتنا وكلماتك لها مدلولها ومعنى عميق وأشكركم أكثر لو تفضلتم بعدم التعرض لأشخاص بعينها وأجعل شكواك لله سبحانه وتعالى فهو عالم الغيب وما فى النفوس فهما قلنا عن الصالح والطالح فهو خير العالمين بارك الله فيك
10. adel edris قال: فبراير 4th, 2012 at 9:28 ص
    أخونا المخلص أبو السحر : المسحراتي حزنك واضح على ما يجرى على أرض الكنانة ولكن فرج الله لقريب كل عام وأنت بخير وأدعو لك بموفور الصحة والعافية
11. adel edris قال: فبراير 4th, 2012 at 9:31 ص
    الأخت الكريمة : “آمنة حسين أشكر لكم زيارتكم لمدونتنا وأشكركم أكثر لرقة كلماتكم ودعائكم للمسلمين ولمصرنا العزيزة وكل عام وأنتم بخير
12. adel edris قال: فبراير 4th, 2012 at 9:40 ص
    الأخ الغالى الكريم الحبيب صافى القلب : زياد صافي دائما تشجينى كلماتكم ففبها الكثير والكثير من كنوز المعانى ماذا أقول لك يا أخى فمهما قلت لن أفى لك حقا أرجو منك أن تدعو للمسلمين جميعا بالهداية للصلاح والسير على نهج رسولنا الكريم . ولكم تحياتنا بموفور الصحة
13. الجميله نوراي الجميله قال: فبراير 4th, 2012 at 1:31 م
    والله حتى لو تجيب الحاوي دازي التعبان يقرص ويلبد زي العنكبوت عشش على الحيط وسرح على الغيط ــــــــــــــــ بس بركاتك ياشيخه مراهم أصل احنا خلاص هانلاقيها منين ولا منين تحية اجلال منى لحضرتك ولقلمك الرائع لك تحياتي
14. adel edris قال: فبراير 4th, 2012 at 2:31 م
    الجميله نوراي الجميله: أشكرك على تعليقك الساخر الجميل أحنا منتظرين حد يدلنا على حد بيدق الزار ماهو ما ينفعش للهو الخفى إلا زار وكودية تكون متأصلة فى دق الزار ونداء للجميع اللى يعرف شيخة بتدق الزار يدلنى عليها وأنا مستعد لطلباتها حتى ولو كان ورك نمله وعين كتكوت شركسى مدبوح طازة
15. المهـــــــــا قال: فبراير 4th, 2012 at 6:19 م
    استاذ عادل اشكر لك مرورك مدونتي وارجو الله ان لا تكون ذكرى مؤلمة ما قرأته كان عميق الهدف ساخر المغزى.. ندعو الرحمن ان يمن على بلاد المسلمين بالامن والطمأنينة شكرا وتحية
16. HANNAAHMUHANNA قال: فبراير 4th, 2012 at 6:41 م
    أستاذ عادل شكراً لك مرورك لمدونتي وتعليقك على نصي أشكر مرورك الراقي أسلوبك في النص رشيق بصدق وعفوية بساطة الأسلوب رائعة دام ألقك الجميل تقديري وودي
17. adel edris قال: فبراير 4th, 2012 at 9:17 م
    إلى المهـــــــــا : تعليقك أثلج صدرى فأشكرك عليه واتمنى لك مزيد من التألق فى كتاباتك التى ننتظرها وتحياتنا لكم
18. adel edris قال: فبراير 4th, 2012 at 9:21 م
    الى : HANNAAHMUHANNA نشكركم على التعليق الجميل الذى يدفعنى خطوة للامام لكم تحياتى عادل ادريس
19. Ehapop قال: فبراير 11th, 2012 at 4:58 ص
    “فسأله أنتم ولامؤاخذه تبقوا مين فقال له أنا اللهو الخفى واللى معايا ده يبقى الطرف التانى عايز حاجة ؟ فقال له لا أنتم اللى عايزين أى حاجة تانية فقال له هات شوية حمص”ههههههههههههههه على فكرة مش دة اللهو الخفى ولا اللى معاة هو الطرف الثالث بدليل انة قالة هات شوية “حمص” . و الكابتن حمص كان بيلعب فى الاسماعيلى ومش فى المصرى ولامواخذة! اللهو الخفى هو عم البلببببببببببيسى واسال عمر ايمن وهو يقولك علية. وتسلم ايدك على المدونة الرائعة
20. adel edris قال: فبراير 11th, 2012 at 8:36 ص
    الاخ العزيز إيهاب اسعدنى دخلتك الضاحكة واضحكتنى كثيرا ..ز أيوه كده هو أنت تستخبى سنين وتظهر اللى دمه خفيف أمثالك لابد وأن يظهر هذه الايام ليخفف عنا. أما بخصوص عم البلبيسى فأنتهى عصره مع هوجة البلطجة والفلول ياعم ده ها يجى فيهم أيه. تحياتى ونأمل المداومة للزيارة
21. فاطمة أحمد قال: فبراير 16th, 2012 at 4:29 ص
    تصدق يا أستاذ عادل إن الشيخة مراهم كانت لسة عايشة لغاية السنة إللي فاتت.. وبعد موتتها المفاجئة.. إللي حصل حصل.!!!!! هي كانت إختفت من زمااان علشان مابقتش تتعامل مع الناس الغلابة إللي زي حلاتنا.. كانت عقبال أمالتك ساكنة فيللة أهداها لها واحد من تلاتين سنة .. أصلها عجبتوا جداً لما طلب منها هو وأعوانه ومراته الحيزبون..إنها تقوم بعمل سحر( عمل )جماعي للشعب يسكتهم عن حقهم ميت سنة.. لكن بعدماشافتهم حواليها شغالين في السلب والنهب ..طمعت..وطلبت تقاسمهم..ياإما تطلق عليهم عفاريتها الزرق والحمر ..ولما رفضوا.. هددتهم بإنها ستفضحهم للشعب .. فقاموا بقتلها..!! ففسد سحرها الأسود بعد مرور تلاتين سنة فقط.. وليس مئة كما خططوا لذلك.. وانتشروا العفاريت من كل الألوان وتجمعوا في الميدان .. مطالبين بحقوقهم المسلوبة.. ووضعوا إللي ما يتسموش في الليمان.. أما بخصوص اللهو الخفي.. فموطنه الأصلي أنا عارفاه لكن عايزة حفلة زار جامدة علشان تطلع العفريت إللي ماسك ومكلبش في لساني .!! أستاذ عادل أنا شديدة الإعجاب جداً بقلمك الساخر الساحر مع خالص تحياتي وتقدير ومودتي
22. adel edris قال: فبراير 16th, 2012 at 7:51 ص
    الأخت الكريمة فاطمة ده أحنا ما صدقنا عرفنا حدعارف الموطن الاصلى للهو الخفى لو كلامك جد صحيح أرجو تشوفى لينا الطرف التالت فين برضه ينوبك ثواب أما بخصوص الزار ما تشيليش هم بس أنتى هات عنوان اللهو الخفى وأحنا علينا الزار تحياتى لمرورك على مدونتى وأشكرك على أعجابك بما أكتب
23. zeyad قال: فبراير 23rd, 2012 at 10:50 ص
    عزيزي هذه نماذج الاسلحة الجديدة القديمت بعد ان استورثت اميركا الامبراطوريه الانكليزية فانها طورت مبدأ فرق تسد وصارت تستميل هذا الحزب او التكتل ضد ذاك وتجدهم جميعا اصولهم واستثماراتهم في الخارج وستكتشف يوما توليفات غريبة بين الاشتراكيين والرأسماليين وبين الشيوعيين والاسلاميين وستكشف الايام بان الماسونية العالمية هي من اكبر الاحزاب قاطبة في العالم عموما وفي العرب خصوصا…….. وابدا لن يمر زمان طويل حتى تجد الحاجات مراهمات قد عدن بعد ان يضيع كل شيء دمت بكل ود وخير
24. الكاتب المصرى قال: فبراير 24th, 2012 at 4:00 م
    الأستاذ الفاضل عادل إدريس يبدو أن الفلول قد سبقوك وذهبوا للشيخة مراهم وهى اللى محضرة العفريت أما الشعب ما معاهوش فلوس يدفعهاللشيخة مراهم ~~~~~ خالص تحياتى
25. adel edris قال: فبراير 24th, 2012 at 7:20 م
    الأخ الكريم كاتبنا المصرى شرفت ونورت المدونة ممكن يكون الفلول سبقونا ودفعوا للشيخة مرعم وحضرت العفريت وهى الى تقدر تصرفه … لكن عايزة كتير ومين معاه يدفع!؟؟؟؟ تحياتى يا كاتبنا يا كبير
26. loly قال: أبريل 28th, 2012 at 11:36 م
    ههههههههههه ماهو مننا برده هيكون منين يعني ولو عاوزين نشوفوه هنشوفوه بس مش مهم خللي البندانة المرادي على عنينا كمان شويتين
27. الصحيفة الصادقة قال: أبريل 29th, 2012 at 10:07 ص
    جمييييلة جداا
28. صحة اون لاين قال: أبريل 29th, 2012 at 2:23 م
    دمت بالف صحة وحب