أنا ضد قانون التظاهر

قرأت قانون التظاهر بتمعن ولم يعجبنى أطلاقا وأرفضه كلى وجزئى وأعلنها صراحة بأنه عوار فى حق من أصدره.

يعنى إيه واحد ولا حتى شوية شايلين صندوق مولوتوف ساقع ونازلين يحتفلوا برأس السنة بتاعتهم وفرحانين نقوم نعكنن عليهم الفرحة و نرش عليهم بخراطيم المياه وبعدين قنايل مسيله للدموع ده كلام برضه.

ولا شوية مقاطيع وبلطجية شايلين بنادق وطبنجات وبيحتفلوا بصديق لهم ليلة دخلته وعاملين له أحتفال بسيط وعلى القد نقوم نطفشهم ونطبق عليهم القانون ده كلام برضه.

ولا كام صايع من بتوع حركات وشقلبظات فى الهوا نازلين يشموا شوية هوا فى الشارع ويغنوا سوا فيها إيه يعنى لما يعطلوا المرور ولا حتى يتنيلوا يقفلوا الشارع مش حرام نرشهم يالميه ولا نعميهم بالغاز المسيل للدموع هما جايين يفرحوا ولا يعيطوا ده كلام برضه.

يعنى إيه كام شمام شايلين سنج ومطاوى ونازلين يلعبوا رياضة المبارزة بالشارع نقوم نزعلهم ونقول لهم بلاش لعب عيال ونعمل فيهم كده برضه.

لا لا أنا بصراحة وبأعلنها من هنا وعلى أثير موجة أف أخص ضد قانون التظاهر هذا .

أمال بس عايزينا نتطور الى الديمقراطية ونعيش الحرية ، يا أخونا مصر بتتغير على نار هادية واللى بيحصل ده طبيعى جدا وسو سو إيزى أمال كنتم عايزين ربيع عربى إزاى ما كنا بقى خلناه قاعد فى مكانه ولا جاش عندنا والراجل ما كنش ها يزعل ولا حاجة .

فينك يا عم هولاكو وفين قانونك الحنين .. كان عامل حتة فرمان للتظاهر يدرس أى والله يدرس للحكام.

كان عبارة عن فرمنتين فقط لاغير.

شوف وأتمعنن وأقرأ وسمع غيرك وأتسلطن وسلطن غيرك.

من هولاكو الى عموم الشعوب التى نحكمها

فرمان هولاكيكو بشأن التظاهر السلمى

بخلاف ما جاء بقانون التظاهر الغير سلمى ....................

فرمانه (1)  اللى شايف نفسه متظاهر وعايز يتظاهر ينزل بكل حب وها نشيله على كفوف الراحة لحد المقابر ومالوش خمسان ولا أربعين ولا حتى طلعة رجب.

فرمانه (2) اللى معترض على القانون يعتبرفى حكم المتظاهر وتطبق عليه المادة (1).

مع تحياتى هولاكو

أحنا اللى جبناه لأنفسنا

الحكاية أصبحت سداح مداح واللى نفسه بفتوى يفتيها .. هى دقن وسبحه وشبشب وجلباب قصير وقول يا عم الشيخ وسمعنا أحلى فتاوى هو الكلام عليه جمارك.

وأصبحت الفتاوى زى أزأزة اللب تفتح النت وتخش على تويتر تلاقى حنفية أتفتحت على كل نوع يا فتاوى وحسب الطلب.

ولهذا تلقفنا الغير وأصبح يطبخ الفتاوى ويسخر من الإسلام وللأسف الشديد نحن كمسلمين نقع فى الفخ كوننا الآن منقسمين ما بين معارض ومؤيد وكل يدلو بدلوه مستخدما ما يقع بيده من سخرية وهذا ما حدث بالفعل فقد وقعت تحت بداى فتوى مضحكة ومن الوهلة الأولى تعرف انها مفبركة ولم بفتى بها فتاى ولكن ما دامت الفتاوى على كل لون يا باذنجان فقد يصدقها البعض لسابق تشابهها مع فتاوى أخرى تراقص لها البعض وهتف وقال :

" بص شوف عم الشيخ بيقول إيه "

وتقول الفتوى وهى لشخص قد يكون وهمى أسمه أبو الإيمان:

أنقلها لكم من موقع تويتر :

" لا يجوز للمرأة المسلمة أن تأكل اللازنيا لأنها قريبة من كلمة زانية فقد تصبح كذلك وتسهر كل ليلة بحضن رجل آخر وتدمن المخدرات والعياذ بالله ".

بالتأكيد هى فتوى مفخخة الغرض منها السخرية ولكن بقى السؤال:

هما ولا أحنا اللى جبناه لأنفسنا؟.

ومش بعيد نجد أحدهم يفبرك فتوى ليقول :

"لا يجوز لرجل مسلم أن يشترى سرير من الخشب البلوط حتى لا يصبح من قوم لوط"

عليه العوض ومنه العوض ورحماك يا اااااااااااااااااااااااااااااارب

اللورد كور أمبو بتاح

نداء أرسله لى أحد الأصدقاء يقول:

من أبو إياد وجماعته

أستمروا بالكفاح وأن نصر الله لقريب ، نبارك لأنفسنا تفجيرات اليوم وعلى الله توكلنا لنحرر أرضنا من الأنجاس .

قرأت ذلك وقلت لنفسى لقد حان وقت الرحيل وسأحزم أمتعتي متجها لهيئة غوث وعون اللاجئين فقد تأوينى مبكرا بإحدى المخيمات على حدود تركيا أو ترمينى لاحدى البلدان الأوربية أهو منها لجوء ومنها أمتع نفسى بالشقراوات.

سرحت لحظات أسترجع فيها كفاح المصريين إبان الاحتلال البريطانى لمصر والعدوان الثلاثى وربطت ما يحدث الآن من تفجيرات لمبانى الجيش وقتل الجنود والضباط وما كان يحدث من تفجيرات بواسطة الفدائيين بكمبات الانجليز بالعباسية والإسماعيلية وهى نفس النداءات التى كانت ترسل للفدائيين بعد كل عملية فدائية.

لقد أعتبر هؤلاء أن الجيش المصرى والشرطة هما الاحتلال والمؤيدين هم الحلفاء وأن ما يفعلوه هو الكفاح ضد الاستعمار وأعوانه من الحلفاء .

ولكى تكتمل الصورة ونفس المشهد وبدلا من ان يخرج الطلبة من جامعة فؤاد والطالبات من مدرسة السنية يخرج الطلبة والطالبات من جامعة الأزهر يهتفون يسقط يسقط حكم العسكر ويا عبيد يا عبيد أحنا أسيادة وأنتوا بيادة بدلا من الاستقلال التام أو الموت الزؤام ويا عزيز يا عزيز كبه تاخد الانجليز وطبعا مش ها نسمع عاش الهلال مع الصليب ولكن يا ترى هل ستصدح أغنية بلادى بلادى لك حبى وفؤادى وسيرفع علم مصر عاليا خفاقا وسيشفى حسين رياض من الشلل ويغنى مع شكرى سرحان وصلاح ذو الفقار أم سيصدح نشيد أمان يا للى أمان والله ورجعت أيام زمان وبالتأكيد سيرفع العلم الجديد بعدما حرق علم مصر.

الناس دى عايشه دور الكفاح والفدأنة ومعتبرين أنهم هم أولاد الأرض وتم أستعمارها من الفراعنة إبان حرب أبيس بقيادة كوع عنخ كمون وآن الأوان لرفع الحماية الفرعونية وطرد اللورد كور أمبو بتاح المعتمد الفرعونى.

الحكاية دى هرشالى نافوخى أوى فى حاجة مش فاهمها مش يمكن فعلا اللى بيحصل ده صح الصح وأنا الزهايمر ضربنى بدرى؟.

اللهم أزح عنا الغمة وأهدنا الرشاد يا رحمن يا رحيم

مستر هنفى ديمقراسى

يالها من مفاجأة فأثناء خروجى من إحدى الندوات المقامة بأحد فنادق القاهرة تشبهت عليه جالسا بأحد اركان اللوبى وقد تشككت فى بادىء الأمر أن يكون هو لهيئتة فقد كان يلبس بدلة من النوع الفاخر تقدمت منه وسألته:

-       مش حضرتك برضه الأخ حنفى ليبرتى؟.

-       اها وسهلا أنا هنفى ديمقراسى .. مين بقى حضرتك ؟ أكيد من المتابعين ليا سمان.

-       تقدر تقول كده وكنت تعرفت عليك بالغرزه أياها اللى بالقرب من ميدان التحرير.

-       يوووه أنت لسه فاكر دى كانت كى جى ون كفاح.

-       وده من إيه .. يعنى التغيير ده جه إزاى.

-       تطور وبرضه الواحد لازم يمسى مع الجديد رغم التعب ومن جد وجد.

-       والتطور ده جه إزاى؟

-   دى حدوته طويله بدأت لما سافونى على الكنوات الفدائية مصهلل وبأقول أحلى قول وهوبا ما فيس يومين لاقيت واحد محترم زى سعادتك كده جالى على الغرزة وخدنى معاه وقعدنا قعدة خد وهات وهوبا لقيتنى راكب التيارة وهوبا أحنا فين يا جماعة قالولى فى أوكلانيا البلد وقعدت كام اسبوع واكل سارب متفسح قابض بالاخضرانى.

-       ما شاء الله يعنى كانت فسحة لوجه الله؟

-       يا عم الباسا أفهم بقى أحنا كنا بندرس أصول الديمقراسي وأساى نخليها تنعنس البلد.

-       أها يعنى زى الناس بتوع 6 ابريل والتانيين يعنى.

-   قسدك مهوره ودومة وسوية البنات السقع .. دول كلهم حبايبى وأسحابى بس دول ليهم خط وأنا والجماعة اللى كانوا معايا لينا خط تانى هما بيشتغلوا تهييج إنما احنا بتوع الفرقعة.

-       يعنى انتم تبع الاخوان ولا تبع مين بالظبط؟

-   سوف سعادتك أحنا حسب خارطة الطريق الديمقراسية ممكن الصبح نكون بنسخن مع الاخوان وعلى المسا نكون سغالين ضدهم يعنى تقدر تقول كده تسليك وكده توليع.

-       طيب إيه الاستفادة من كل ده؟

-   يا هندزه زى ما قلت لك أحنا مهمتنا تعديل وضع البلد علسان تكون بلد ديمقراسي يعنى لو الحته دى عايزة تتسند بطوبه نسدنها ولو الحته اللى هناك دى عايزة ساكوس وكام مسمار نديها فهمت.

-       الله يكون فى عونك يا مستر هنفى.

-       سانك يو ويرى ماتس.

-       الله الله ده أنت اتعلمت لغات.

-       ما هو لازم كام كلمة انجليسى على حتتين فرنساوى على المانى علسان يمسى الحال.

-       صح الصح والله ده أنت بطل وها تكون ليك بصمة فى تعديل مصر يا مستر هنفى.

-       ميرسى باكو ... بس أنت أدعى لينا ما حدس يبصلنا فى اللى أحنا فيه ويبحلقوا فينا لا ها تبقى فى ديمقراسى ولا نيله وتفضل مصر زى ما هى متأخره سنين ولا ها نلحق حتى السومال.

-        بأدعيلك من كل قلبى يا هنفى بس أنت متأكد من اللى أنت بتعمله ده ديمقراسيه.

-   يا عم وحد الله  وقول يا رب  أمال بنعمل إيه عجين الفلاحة؟ أنت مس عايس معانا فى البلد ولا إيه ما بتسوفس مولد سيدى فرقعة  كل جمعة بلاس دى ما بتسمعس عن مظاهرات الجامعات ولا إيه؟.

-       بسوف وبأسمع.

-       أهو ده بقى السغل بتاعنا.

-       تسدق أنا كنت فاهم غلط.

-   معلس كلنا كنا كده وسويه سويه فهمنا وربنا وقعك فى طريقى  علسان تعرف الأصة وخدت كرسى فى الديمقراسى عمرك ما كنت ها تعرفها  إلا منى صح يا هندزه.

-       صح يا مستر هنفى .. انا متشكر على اللقاء الجميل ده.

-       داكن شاى.

-       لا شكرا ما بشربوش.

-       هههههههههههه دى بالالمانى يعنى شكرا.

-       يااااااااااه معلش يا مستر هنفى العتب على الفهم .. أشكرك واتركك فى رعاية الله.

-       ما يصحس تمسى قبل ما تاخدلك كاس معايا.

-       الف شكر ما ليش فيه ... هو انت سبت البانجو؟.

-       ما خلاس بقينا بنعفر أجنبى وبنديها ميه صفرا.

-       أسيبك بقى لمشاغلك وأشوفك على خير .

-   الكارت بتاعى أهه فيه ارقام الموبايلات بتاعتى والايملايت وسفحتى على الفايس بوك أدخل وسوف وأتفرج وأدعيلى وقول الله يخليك.

ثقب الأوزون ولبس الفيزون

       الظوهر الفلكية معروفة حتى من منها يأت بعد قرون ولكن الظواهر البشرية تأت فجأة فنجدها أمامنا دون سابق إنذار فبعد ظاهرة عبدة الشيطان وأولاد دراكولا وزواج المثيلين والأيمو والمثقفين الجدد ورخصة اللواط وعودة الجوارى و نكاح الجهاد وأرضاع الكبير وهشتكة الصغير والمضاجعة الأخيرة  أسترعى أنتباهى ان مجموعة من الشباب يقفون أمام أحد المحلات يتناولون الأيس كريم برقة ودلع يرتدون بنطال شفاف لامع محزق خانق يظهر كامل عوراتهم فسألت أحدهم عن نوع قماش هذا البنطال فقال لى: فيزو وينطقها البعض فيزون أو فيسون فمصمت شفتاى وتطلعت لهم وقلت بصوت مسموع رحماك يا رب رحماك يا رب لقد أوشكت القارعة أن تأت فسمعنى أحدهم فنظر إلى بغضب مائع  وقال : أنت متخلف  ريلى  " حقيقة " متخلف!.

       سرحت للحظات وتوقفت أسترجع زكريات الزمن الماضى وكم كانت هى الرجوله وتحسرت على بناتنا المقدمات على الزواج فكيف سيخترن من بين هؤلاء هل بلون الفيزون؟.

أبتعدت وأنا أقول لعنة الله عليك يا ثقب الأوزون فقد جئت لنا بمن بلبسون الفيزون وبالصعيدى الفازون.

طلع وما طلعش

" جوله حره بداخل المحروسة  بعد عدم ظهور برنامج باسم يوسف "

• أم حموءة : وهى تقطف الملوخيه ها يطلع لا مش ها يطلع واخيرا ما طلعش يا خسارة كان بيضحكنا المضروب.

• شاب متأزم جدا : ده تعريص واضح ازاى ده يحصل كان لازم يطلع كان لازم يطلع لكن ما طلعش.

• شاب حالم : لو كان طلع كنا ها نقول أننا نعيش حرية الرأى لكن بكل أسف ما طلعش.

• شاب مناصر : ايام مرسى كان بيطلع بيقول اللى عايز يقوله وبراحته أشمعنا دلوقت ده دليل على عودة أمن الدولة أهو ما طلعش.

• شاب ثورى : رجعنا لزمن تكميم الأفواه ولما قال كلمتين قلنا مش ها يطلع وفعلا ما طلعش.

• بنت لافلى : بصراحة كان دمه نايس فيرى نايس وكان لافلى آى آم ساد يا خسارة ما طلعش.

• بنت فافى : تصورى يا مامى أنا وصحباتى فضلنا نعيط نعيط علشان ما طلعش.

• المعلم ضانى الجزار :الهي ما يطلع ولا نشوف خلقته ده واد مايص ما يفرقش عن النسوان كتير كويس انه ما طلعش.

• واحد مجامل : ده عميل أورو أمريكانى بيلعب على الونجين محقون خبث وحقد احسن انه ما طلعش.

• شاب تمردى :هو فاكر نفسه ها يكون واد محبوب ونطلعله بمليونية ... يغووور وما يطلعش.

• ام باتعة بتاعة الخضار: ده واد نى موكوس شكله ما أستواش ... الستات أرجل منه احلى حاجة انه ما طلعش.

• أتنين ستات : بكره ياختى يطلع ويقول عيوب فنية فى التسجيل ويرجع يبصبص لنا بحواجبة ... صح والله يا ختى ويبطلوا يقولوا ما طلعش.

• أتنين حشاشين : قولك إيه فى الواد الناعم اللى ما طلعش ده ... القول قولك يا كبير هو حد يعرف غيرك ليه ما طلعش.

• عادل إدريس : جتنا نيله منيلة بطينه مطينة أحنا فى إيه ولا فى إيه آدى اللى خدناه من مستنقع الحرية الطافح والعيب عيبك ياللى فى بالى انت اللى خليته يمرمط فى خلق الله ويلعب حواجبه كما يشاء ويتلفظ بالفاظ نابية وإيماءات كلها توحى بأنه فعلا كما قلت من قبل أنه من الجنس الرابع شوفوا بقى الجنس الرابع وما ادراك ما هو يعنى ليس برجل وليس بأمرأة وليس بأخنث ... وها نحن نعيش الآن عصر الحرية المرحرحة التى يريدها الكثيرين ومش بعيد يجى يوم يخش بينا تريقة على الأزهر ومن بعدها على الأنبياء ونضحك ونضحك ونعلى الضحكاية أوى ويا سيدى الحساب يوم الحساب وضحكنى النهاردة وعذبنى بكره ودخلنى النار أدفى.

طلع ما طلعش عنه ما طلع .