إعلان

الآن بجميع مكتبات مصر والوطن العربي --------->>>>> (( أحدث إصدارات الكاتب عادل إدريس المسلمي..... " الزناتي حنيفة -العجب ألوان - مقرمشات ساخرة " عن دار الراية للنشر والتوزيع ))<<<<<------


السبت، 24 مايو، 2014

أم السعد تتحدى

مررت عليها وهى تجلس كعادتها ترتب كومة الخيار التى أمامها....
- صباح الفل يا ست الكل صباح الياسمين ع الناس الحلوين.
- إيه ده كله إيه ده كله يا عم الحاج ... صباحك نادى وسرح وأخضرانى.
- والنبى انت عاجبانى أوى يا أم السعد.
ضحكت وعدلت من طرحتها وقالت لى:
- عجباك ههههههههه يا راجل ! ولا أهو كلام زى اللى بتقوله للبت سعاد بتاعة الفاكهة وتخليها تنقيلك احلى حاجة.
- لا والله انت فعلا عجبانى ومعششه فى نافوخى.
نادت على جمعة بصوت عالى: انت يا منيل على عينك هات بسرعة كرسى لعم الحاج واطلب له عناب ساقع.
ثوانى وجاء جمعة بالكرسى فقالت له : حطه هنا جنبى فى الضله وأستعجل العناب.
قالت لى : أمال لو كنت شفتنى بقى زمان وأنا لسه بنت كان كل اللى فى السوق بيبص عليا فى الروحه والجايه لغاية لما جه المعلم شعبان وخطفنى خطف.
- بس أنت ما شاء الله خَضار وحلاوه.
- يجيك إيه يا عم الحاج هههههههههه أشرب العناب ولا اطلبلك قهوة تعدل مزاجك.
قالت لها : رايحه تنتخبى ولا ها تقعدى جنب الخيار ؟.
- قصدك يعنى اعمل زى الناس اللى ها تبلط وتبص من بعيد اللى بيقولوا عليهم مأنطعين ومش رايحين؟ لأ بأذن الله رايحه أنتخب بس اللى على مزاجى وما حدش يقولى فلان ولا علان .. آه .. ماهو الناس اللى بتحب مصر وتعبانه وشقيانه لازم تدور على الصح وتعمله وسيبك من اللى عاملين نفسهم مسأفين أوى دول وهما اللى ها يعدلوا حال البلد الواحد من دول تلاقيه نافش نفسه زى الديك الرومى وماشى مستألط ورايح فين يا أفندى رايح اعمل زيطه وجاى منين يا فندى جاى من هناك وغرضك ايه يا فندى عايز حريتى واتلق ايديا وأعيش زى بتوع أونوبا وأنريكا .
- بس فى ناس برضه خايفه تنتخب فلان يطلع فرعون أوتنتخب علان يطلع شملول .
- اللى خايف ده لا مؤاخذه أهبل وعبيط ... وبعدين مين من دوووووول كلهم شاف اللى أحنا شفناه ولا تعب زينا ولا اتمرمط زينا ولا حتى نام زينا دول يا عم الحاج نايمين أحلى نومه وواكلين البتاع ده اللى أسمه ... أسمه ... يا واد يا جمعه تعالى بسرعة .... البتاع ده اللى بيجى فى التلفسيون اللى سـلتك عليه أسمه إيه يا منيل ... قصدك هنبورجن .... أيوه الهنمورجن ده ؛ يبقى إيه اللى تاعبهم حد فيهم أكل المش بدوده مع بصلة ورغيف مقدد ؛ حد فيهم كان بياكل اللحمة كل موسم ... تعرف مره قلت لواحد من الجماعة دول اللى بيقولوا على نفسهم حراس الثورة وكان لابسلى بنطنون مهربد من على ركبته وفاننه يا دوب مغطيه صدره بالعافية وراسملى على دراعاته حاجه كده زى الحنش العيان قلت له: أنت عايز إيه بالظبط أنا فتكرته ها يقولى كلام يدخل الدماغ لقيته بيكلمنى بلسان عوج حته عربى على حته افرنجى ولما تعب وما عرفش يفهمنى ووقعت اللبانه من بقه وقعد يدور عليها راح ماشى .
- ده انت ما شاء الله عليك يا ام السعد مدرسة فى الحياة .
- الدنيا علمتنا كتير ؛ مش دوول اللى جايين يقولو لينا إزاى نعيش ولا نروح ننتخب ولا ما ننتخبش ؛ ربنا يهديهم ما هى الهوجة لما جت على مصر قلبت وطلعت من تحت الارض على كل لون يا أشكال ؛ إيشى أحول كلام وإيشى أهطل افعال وإيشى أعمى الوان.
- ومش خايفه تجيلك طوبه ولا خرطوش وانتى رايحه.
- انا ما بخفش الا من اللى خلقنى وبس وبعدين سيبك من اللى بيقول كده انا ما اصدقش الكلام ده ان ممكن حد مصرى بحق يعمل كده .
- مش باقولك عجبانى أوى أوى .
- هههههههههه يا راجل المعلم يسمعك.