الشيف عوكشة...
خش عليا يا سحس بالكاميرا .. زووووم علي الوش وصحصح معايا...
سيداتي متابعينا علي قناة حبشتكة أهلا بكم معنا وطبخة جديدة من الشيف عوكشة الحريف...
النهاردة بقي ها تتعرفوا علي طريقة جديدة وحصرية لعمل الملوخية.
إحنا قدمنا لكم من قبل طريقة عمل الملوخية بشوربة اللحمة الضاني والبتلو والكندوز والماعز وعرفنا بردو طريقة عمل الملوخية بشوربة الفراخ بنوعيها الفروج والديوك وعملنا ليكم كمان الملوخية بشوربة الحمام البطوطى والزغاليل وكمان الملوخية بشوربة البط البلدى والدمياطى وكمان بشوربة الاوز وشوربة الديك الرومي واليوناني وكمان بشوربة الجمبري وكمااااااااااااان كان لينا السبق وقدمنا ليكم الملوخية بشوربة عضم النملة الهندى .
وعرفناكم علي جميع أنواع الشهقات ويكل اللهجات .. الشهقة بتاعة الست جملات المصرية وشهقة أم حبلصة الأصلية وشهقة العروسة الجديدة .. وكمان لاخواتنا بالبلدان العربية عرفناكم شهقة أم نزار السورية وشهقة الست أم هيفاء اللبنانية وشهقة عيوشة المغربية وشهقة مسعودة التونسية وفطومة الليبية و شهقة عتاب الإماراتية وشهقة ريم السعودية وشهقة حبوبة السودانية وشهقة أم نضال الفلسطينية وشهقة أم ناظم العراقية ما حرمنكوش بردو وعرفناكم شهقة أم تراوري الصومالية .
يعنى ما فيش حد منكم ما تعرفش تعمل الملوخية علي كل لون وبكل شهقة.
والمفاجأة بقي الجديدة واللي تعتبر حصري وجديد لقناة حبشتكة هي ...
الملوخية بشوربة البيض المسلوق وبشهقة لأول مرة ها تتشهق قدامكم وهي شهقة
أم مهند اللي بتقول " يا رب اللي ياكل ملوخيتى يقول بحبك يا مزتي".
جربوها وها تلاقوها ألذ ألذ ألذ .. وادعولي .
اهي دى بقي الحركات والتكات اللي هرشت دماغ الستات
